Bakı. Trend:
Türkiyə Mərkəzi Bankının Pul-Kredit Siyasəti üzrə Komitəsinin iyunun 19-da keçirilən iclasının nəticələrinə əsasən, Türkiyədə əsas uçot dərəcəsinin dəyişilməz olaraq – 46% civarında saxlanılmasına qərar verilib.
Trend xəbər verir ki, bu barədə Türkiyənin tənzimləyicisinin saytında məlumat yayılıb.
Bundan başqa, Mərkəzi Bank kreditlər üzrə overnayt faiz dərəcəsini 49% civarında, depozitlər üzrə overnayt faiz dərəcəsini isə 44,5 faiz civarında saxlayıb.
Tənzimləyicinin açıqlamasında vurğulanır ki, bundan sonrakı dövrdə Türkiyə Mərkəzi Bankının qərarları inflyasiyanın azaldılması və ortamüddətli perspektivdə 5%-lik inflyasiya hədəfinə çatmaq üçün zəruri olan pul-kredit və maliyyə şəraitinin formalaşdırılmasına yönəldiləcək.
Xatırladaq ki, əvvəlki – aprel iclasında Türkiyə Mərkəzi Bankı gözlənilmədən əsas faiz dərəcəsini 42,5%-dən 46%-ə qaldırmışdı.