Bakı. Trend:
Birləşmiş Ərəb Əmirlikləri (BƏƏ) Yəməndə son dövrlər yaşanan hadisələri yaxından izlədiyini bildirir və ölkədəki gərginliyin davam etməsindən ciddi narahatlığını ifadə edib.
Trend xəbər verir ki, bu barədə xarici KİV-lər məlumat yayıb.
BƏƏ vətəndaşları, xüsusilə qardaş Yəmən xalqını müdrikliyə, səbr və təmkin göstərməyə və ölkədə təhlükəsizlik və sabitliyin təmin edilməsi üçün əməkdaşlığa çağırır.
Rəsmi bəyanatda vurğulanır ki, BƏƏ Yəmən və bölgənin təhlükəsizliyi, sabitliyi və rifahına sadiqliyini qoruyur. Ölkədə mövcud gərginliyin aradan qaldırılması, dialoqun münaqişəyə üstünlük verilməsi və Yəmən xalqı arasında mövcud fikir ayrılıqlarının razılıq və anlaşma yolu ilə həll olunması vacibdir.
Bu prosesin rasional və məsuliyyətli yanaşma əsasında həyata keçirilməsi, ölkə və xalqın maraqlarının prioritetləşdirilməsi, sabitlik və rifahın ön plana çıxarılması zəruridir.
BƏƏ həmçinin bildirir ki, mövcud çağırışların öhdəsindən gəlmək və Yəməndə uzunmüddətli sabitlik təmin etmək üçün dialoq və de-eskalasiya ən effektiv yoldur. Bu yanaşma həm Yəmən xalqının, həm də regionun təhlükəsizlik və rifah arzularının reallaşmasına xidmət edəcək.