...

Nəzakət Teymurova: 20 gün evdə qalmaqla heç nə itirmərik, əksinə, sağlamlığımızı qorumuş olarıq

Mədəniyyət Materials 31 Mart 2020 11:49 (UTC +04:00)
Bunu Trend-ə açıqlamasında xanəndə, Azərbaycanın xalq artisti Nəzakət Teymurova deyib.
Nəzakət Teymurova: 20 gün evdə qalmaqla heç nə itirmərik, əksinə, sağlamlığımızı qorumuş olarıq

Trend-i buradan izləyin

Bakı. Orxan Cuvarlı - Trend:

İnsanlar hələ də başa düşmürlər ki, koronavirus infeksiyası nə qədər təhlükəlidir, nələrə gətirib çıxara bilər. 20 gün evdə qalmaqla heç nə itirmərik, əksinə, sağlamlığımızı qorumuş olarıq.

Bunu Trend-ə açıqlamasında xanəndə, Azərbaycanın xalq artisti Nəzakət Teymurova deyib.

Onun sözlərinə görə, dövlət bu məsələdə əlindən gələni edir:

“İnsanlar daha da maarifləndirilməlidir. Hələ də anlamırlar, ya da anlamaq istəmirlər ki, başımıza gələn nədir, nələrlə nəticələnə bilər. Mən vətəndaşlardan xahiş edirəm ki, cənab Prezident İlham Əliyevin çağırışlarına, aidiyyəti qurumların tövsiyələrinə ciddi şəkildə əməl etsinlər. Bunu ciddi qəbul etmək lazımdır. Özünüzü qorumaqla siz həm də yaxınlarınızı, sevdiklərinizi qorumuş olacaqsınız”.

Xalq artisti qeyd edib ki, dünyanın alışıb yandığı, qlobal bir bəlaya məruz qaldığı bir vaxtda xalqımız bunun fərqində olaraq daha ciddiyyətli, təmkinli olmalıdır:

“Gərək özünüzün ya da bir yaxınınızın başına gəlsin, sonra inanasınız? Biz 20 gün, bir ay evdə qalmaqla heç nə itirmirik, əksinə, sağlamlığımızı qorumuş oluruq. Dövlətimiz əlindən gələni edir. Bizim öhdəmizə düşən evimizdə qalmaq, həmrəylik göstərərək dövlət rəsmilərinin çağırışlarını cavabsız qoymamaqdır”.

Xatırladaq ki, koronavirus (COVID-19) infeksiyasının Azərbaycan ərazisində geniş yayılmasının qarşısının alınması üzrə dövlət tərəfindən həyata keçirilən tədbirlər çərçivəsində insanların fərdi evlərində və mənzillərində, daimi və ya müvəqqəti yaşadıqları (olduqları) yerlərdə qalmaları tələb olunur.

Qeyd olunanlarla əlaqədar insanların həyat və fəaliyyəti üçün zəruri olan iş və xidmət sahələrindən başqa digər istiqamətlər üzrə fəaliyyət 2020-ci il 31 mart saat 00:00-dan 2020-ci il 20 aprel saat 00:00-dək dayandırılır.

Fərdi evlərdən və mənzillərdən insanların çıxışı - təxirəsalınmaz tibbi yardıma zərurət olduqda, həyat və sağlamlığa bilavasitə təhlükəli vəziyyət yarandıqda, fəaliyyətinə icazə verilən pərakəndə satış və əhaliyə xidmət göstərən obyektlərə getmək, məişət tullantılarının atılması hallarında, eləcə də xüsusi rejim dövründə fəaliyyət göstərən təşkilatlarda xidməti vəzifələrini icra etmək məqsədilə mümkündür.

İnsanların bir-biri ilə ünsiyyətini minimuma endirmək və bununla da infeksiyaya yoluxmanın sürətinin azaldılması məqsədilə bir sıra iş və xidmət sahələri üzrə fəaliyyət elan olunan müddətdə qadağan edilib.

Məqalədə:
Xəbər lenti

Xəbər lenti