Azərbaycan, Bakı, 24 fevral /Trend, müxbir Məftun Salmanov/
İngiltərədə Aleks Simmons və Emi Evinq cütlüyü bəyin 103 sağdışı və gəlinin 103 rəfiqəsinin iştirakı ilə evləniblər.
Trend-in "Türkiyə" qəzetinə istinadən verdiyi məlumata görə, bununla da onlar Ginnesin Rekordlar Kitabına düşməyi bacarıblar.
Rekord vurmaq fikri toy təşkilatçısı Ebbi Luisə məxsus olub. O deyib ki, əvvəlki rekordda gəlinin 126 rəfiqəsi, bəyin isə 47 sağdışı olub.
Rəfiqələrin və sağdışların sayının çoxluğundan cütlük toylarına demək olar ki, heç kimi çağıra bilməyib. Rəfiqələrin və sağdışların toyda eyni paltar geyinməsi maraqlı görüntülər yaradıb.
"Running Park"da keçirilən mərasim 110 min funt-sterlinqə başa gəlib.