Türkiyə Ermənistanla münasibətlərin normallaşması prosesində Azərbaycanın maraqlarına heç vaxt xor baxmayacaq. Bu barədə Türkiyənin xarici işlər naziri Əhməd Davudoğlu deyib, - Cihan agentliyi xəbər yayıb.
"Türkiyə daim xüsusi münasibətləri olan Azərbaycana hədsiz dəstəyi göstərməkdə davam edəcək", - Davudoğlu bildirib. O əlavə edib ki, Türkiyə hökumətinin Ermənistanla münasibətləri normallaşdırması məsələsində mövqeyi dəyişməz qalıb.
Onun sözlərinə görə, Ermənistanla münasibətlərin normallaşdırılması üzrə protokolların imzalanması Ankaranın Cənubi Qafqazda sülhün və sabitliyin bərqərar olması məqsədilə vacib addımdır, lakin bu, kifayət deyil.
"Regionda uzunmüddətli sülh və sabitlik üçün Ermənistan və Azərbaycan arasında münaqişəni həll etmək lazımdır. Türkiyə-Ermənistan münasibətlərinin normallaşdırılması bu konteksdə kifayət etmir", - Davudoğlu qeyd edib.
Ötən ilin oktyabrında Sürixdə Türkiyə və Ermənistan XİN rəhbərləri ölkələr arasında 1993-cü ildə dayandırılan ikitərəfli münasibətlərin normallaşdırılması haqqında protokol imzalayıblar. Protokolların qüvvəyə minməsi üçün hər iki ölkənin parlamenti onu ratifikasiya etməlidir.
Türkiyə hökuməti bəyan edib ki, Ankaranın Yerevanla münasibətləri Ermənistan Azərbaycanın işğal etdiyi əraziləri azad etdikdən sonra bərpa olunacaq.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan silahlı qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.1990-cı illərdə BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Türkiyəli nazir bildirib ki, Cənubi Qafqazda vəziyyətin sabitləşməsi Ankaranın xarici siyasətinin başlıca məqsədlərindən biridir.
"Cənubi Qafqazdakı hazırkı münaqişələr sülhün və sabitliyin bərqərar olmasına maneçilik törədir ki, bu da regional ölkələri, o cümlədən, Türkiyə üçün daim təhlükə yaradır", - Davudoğlu qeyd edib.
Ermənistanla protokolların gələcəyindən danışan Türkiyə xarici siyasət idarəsinin rəhbəri bildirib ki, sənədlər hər iki parlamentin təsdiqindən sonra qüvvəyə minəcək.
Apreldə Ermənistan prezidenti Serj Sarkisyan öz fərmanı ilə ölkə parlamentində Ermənistan-Türkiyə protokollarının ratifikasiya olunması prosedurunu dayandırıb.