Azərbaycan, Bakı, 24 iyun /Trend, müxbir E.Tarıverdiyeva/
Kazan Kremlində Azərbaycan, Rusiya və Ermənistan prezidentləri İlham Əliyev, Dmitri Medvedev və Serj Sarkisyanın Dağlıq Qarabağ münaqişəsinin nizamlanması ilə bağlı danışıqları başlayıb.
Trend-in Rusiya KİV-nə istinadən verdiyi məlumata görə, bu gün tərəflər münaqişəsinin nizamlanmasının baza prinsiplərini müzakirə edəcəklər.
"Nəticə əldə etmək üçün bir-birimizə yaxın olmalıyıq" Medvedev görüşün başlaması ərəfəsində deyib, məlumatı RİA-Novosti agentliyi yayıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.