Azərbaycan, Bakı, 6 oktyabr /Trend, müxbir M.Əliyev/
Nikola Sarkozinin regiona səfəri ilk növbədə Fransanın Cənubi Qafqaza marağını nümayiş etdirir və bu ölkələrlə mühüm strateji-iqtisadi, siyasi planlarının mövcudluğunu göstərir. Bu barədə Trend-ə cümə axşamı Milli Məclisin deputatı Zahid Oruc bildirib.
O qeyd edib ki, Fransa Avropa İttifaqında xüsusi çəkiyə malik olan dövlət kimi həmişə özünəməxsus mövqe tutub və proseslərin fərqli aspektə getməsində rol oynayıb. "Avropa arealında ABŞ-dan və digər nəhəng ölkələrdən fərqli siyasəti gündəliyə çıxarmaq və onu həll etməyi bacarmaq Fransanın imkanları çərçivəsindədir", - millət vəkili deyib.
Oruc hesab edir ki, Fransa Cənubi Qafqazda gedən proseslərə aktiv təsir göstərmək niyyətindədir. "Fransa bu bölgənin münaqişə məkanlarına yaxşı bələddir", - o deyib.
"Son iki ilə yaxın dövrdə Rusiyanın aktiv rəhbərliyi altında həmsədrlərin iştirakı ilə keçirilən görüşlərin heç bir nəticə verməməsi fonunda Sarkozinin səfəri Fransanın qarşıdakı dövrdə Dağlıq Qarabağ prosesində aktivləşəcəyinin anonsunu verir", - millət vəkili deyib.
Oruc Sarkozinin səfərinin hər üç ölkənin maraqları çərçivəsində olduğuna və gələcəkdə onun nəticələrinin özünü göstərəcəyinə əminliyini vurğulayıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.