Azərbaycan, Bakı, 05 fevral / "Trend müxbir R.Hafizoğlu/ İslamın iki aparıcı məzhəbinə məxsus şiə və sünni alimlərin terror və radikallığa qarşı birgə mübarizə aparması İraqda sabitliyi təmin edə bilər. "İraqda şiə və sünnilərin terrora qarşı birgə mübarizə aparmaq üçün birləşmələri regionun sabitliyi üçün çox önəmlidir" - deyə iraqlı politoloq Əhməd Təqiy bildirib.
"Əl-Cəzirə" telekanalının verdiyi məlumata görə, fevralın 3-də İraqda şiə və sünni alimlər terror və təkfirə (islam prinsiplərinə zidd hərəkətlərdə ittiham) qarşı birgə mübarizə aparmaq üçün konfrans keçiriblər. Sünnilər arasında böyük nüfuz sahibi olan Şeyx Yusif əl-Qərdavi və şiələrin nüfuzlu alimi Məhəmməd Həsən Fəzlullah qeyri-muəyyən səbəblərdən toplantıda iştirak edə bilməyiblər.
İraqlı ekspertlər ilkin mərhələdə bu görüşün bir o qədər də nəticə verməsə də, gələcək şiə-sünnü dialoqunun baş tutması üçün önəmli bir addım olduğunu düşünürlər.
"Şiə və sünni alimlərin terrora qarşı birləşmələri tək İraq üçün deyil, bütün ərəb dövlətləri üçün önəmlidir" - deyə Fərat strateji araşdırmalar mərkəzinin direktoru Təqiy çərşənbə axşamı telefonla Kərkükdən Trend ə bildirib. Onun fikrincə, şiə və sünni alimlərin görüşmələri ilkin mərhələdə o qədər də effektli olmasa da, bu görüşlərin davam etdirilməsi gec-tez öz bəhrəsini verəcək.
"İraqda olan hadisələr birbaşa olaraq ərəb ölkələrinə və dünya müsəlmanlarına təsir edir. İki məzhəbin təmsilçilərinin bir araya gəlməsi hər iki tərəfin terror və təkfirdən əziyyət çəkməsindən irəli gəlir" - deyə politoloq qeyd edib .
Ekspert hesab edir ki, İraqdakı sünnilərin şiələri ABŞ ilə əməkdaşlıqda və seçkilərə getməkdə ittiham eiməsi əsassızdır. "İşğal altında olan hər hansı bir regionda seçkilərin demokratik olması inanılmazdır. İraq şiələri sünnilərdən fərqli olaraq daha uzaqgörənlik nümayiş etdirərək seçkilərə qetdilər. Sünnilərin seçkiləri və hökuməti boykot etməsi isə siyasi cəhətdən buraxılan səhvdir" - deyə politoloq vurğulayıb.
"Al-İraq Press" agentliyinin direktoru politoloq Abdullah əl-Cuburi də İraqda şiə və sünni alimlərin bir araya gəlməsini yuksək qiymətləndirib.
"İraqda məzhəb alimlərinin keçirdiyi görüş İraqın və islam ümmətinin gələcəyi üçün çox önəmlidir" -deyə Cuburi çərşənbə axşamı İngiltərədən Trend ə telefonla bildirib.
"İslam faktoru iraqlıların həyatında aparıcı rol oynayır. Məzhəb təmsilçilərinin terror və təkfirə qarşı bir araya gəlməsi nəinki İraqda, həttə bütün müsəlmən ölkələrində sabitliyin qorunmasına gətirəcək" - deyə politoloq qeyd edib.
Onun fikrincə,belə görüşlərin mütəmadi keçirilməsi tez bir zamanda olmasa da, yaxın gələcəkdə öz tövhəsini verəcək.
Şiələr ilə sünnilərin əsas fərqlərindən biri də miladi 632-ci ildə Məhəmməd peyğəmbərin ölümündən sonra xilafətin birinci xəlifə Əbu Bəkrə deyil, peyğəmbərin əmisi oğlu və kürəkəni olan həzrəti Əliyə keçməsi tələbidir.
Müxtəlif kütləvi informasiya vəsitələrində İraqda müharibə başlayandan bu günə qədər ölən və itkin düşənlərin ümimi sayı 350 min, bəzi məlumatlara görə isə 4 milyon göstərilməkdədir.