Azərbaycan, Bakı, 28 mart / Trend müxbir C.Babayeva/ Bakı və Bakı kəndlərinin "Mənəviyyat" İctimai Birliyinin təsis qurultayının keçirilmə vaxtı aprelin 15-dən sonraya təyin olunub. Bu barədə Trend -a Birliyin həmtəsisçilərindən biri, Azərbaycan Ziyalılar Birliyinin sədri Eldəniz Quliyev məlumat verib.
Ötən ilin dekabrın 28-də "Azərbaycan Naminə" ictimai forumun sədri Eldar Namazov, Milli Məclisin keçmiş deputatı Hacıbaba Əzimov, Azərbaycan Ziyalılar Birliyinin sədri Eldəniz Quliyev, Azərbaycanın Yaşıllar partiyasının sədri Mais Güləliyev və Azərbaycanın digər ictimai xadimləri Bakı və Bakı kəndlərinin "Mənəviyyat" İctimai Birliyinin yaradılması barədə bəyanat imzalayıb.
Sənədə ziyalıların 37 nümayəndəsi, Bakı və Bakı kəndlərinin dini xadim və ağsaqqalları imza atıb.
Quliyevin sözlərinə görə, hazırda Təşkilat Komitəsi Bakı kəndlərində ziyalılar və dini xadimlərlə görüşlərini davam etdirir.
Birliyin təsis qurultayının keçirilmə yerinə gəlincə, Quliyev qeyd edib ki, Birliyin əsas niyyətlərindən biri Heydər Əliyev Fondunun fəaliyyətinə dəstək olduğuna görə, təsis qurultayının keçirilməsi üçün yerin ayrılmasında hər hansı bir problem yaranmamalıdır.
Quliyevin sözlərinə görə, təsis qurultayında bir neçə min nəfərin iştirakı gözlənilir.
