Azərbaycan, Bakı, 06 may / Trend , müxbir M.Əliyev/ Türkdilli dövlət başçıları yayda Bakıda toplaşacaqlar. Bu barədə çərşənbə axşamı Ankaradan telefonla Trend a Azərbaycanın Türkiyədəki səfiri Zakir Həşimov məlumat verib.
"Türkdilli dövlət başçılarının Bakıda keçiriləcək doqquzuncu görüşü iyun ayına planlaşdırılıb. Artıq növbəti sammitdə iştirak edəcək ölkələrdən ilkin razılıq alınıb", - deyə səfir bildirib.
Dünyada altı müstəqil türk dövləti mövcuddur. Bunlar Azərbaycan, Türkiyə, Qazaxıstan, Özbəkistan, Qırğızıstan və Türkmənistandır. Təxminən 20 muxtar türk respublikası bir sıra dövlətlərin tərkibinə daxildir.
İştirakçılar sammitin əsas vəzifəsi kimi türkdilli dövlətlərin bazasında vahid iqtisadi məkanın yaradılmasını görürlər.
Türkdilli dövlət başçılarının ilk sammiti 1992-ci ildə Ankarada baş tutub. Daha sonra görüşlər İstanbul, Bişkek, Daşkənd, Astana və Bakıda keçirilib. Sonuncu sammit 2001-ci ildə İstanbulda keçirilib və beş illik fasilədən sonra türkdilli dövlət başçıları 2006-cı ilin sonunda yenidən İstanbulda toplaşıblar.
Sonuncu sammit zamanı Qazaxıstan prezidenti Nursultan Nazarbayev türkdilli dövlətlərin Parlamentlərarası Assambleyasının (PA) yaradılması təklifi ilə çıxış edib. Qazax liderinin ideyasına görə, Assambleya türkdilli xalqların Ağsaqqallar Şurasını tamamlamalı, onun tərkibinə isə "türk dünyasında nüfuzlu olan insanlar, görkəmli siyasi və ictimai xadimlər, həmçinin mədəniyyət xadimləri" daxil olmalıdır. Şuraya sədr qismində isə o, Süleyman Dəmirəli namizəd olaraq təklif edib.
PA-da dünyanın müxtəlif ölkələrində yaşayan türk xalqlarının nümayəndələrinin təmsil olunacaqları gözlənilir. "Onların arasında İranda yaşayan cənubi azərbaycanlılar, Əfqanıstan, İraq, Gürcüstan, Ukrayna və Rusiyada yaşayan türklər də var ", - deyə əvvəllər Trend a Azərbaycan Parlamentinin Türkiyə ilə əlaqələr üzrə işçi qrupunun rəhbəri Nizami Cəfərov bildirib.
Türkdilli dövlətlərin Parlament Assambleyasının yaradılması üzrə işçi qrupun Azərbaycandan olan milli katibi Səyyad Ələsgərovun Trend a bildirdiyinə görə, "Türkmənistan, Özbəkistan, Türkiyə və Qazaxıstan arasında fikir ayrılığı yaranıb. Buna görə də, bu ölkələr türkdilli dövlətlərin Parlament Assambleyasına qoşulmaqdan imtina edir".
Hazırda Türkmənistan və Özbəkistanın türkdilli dövlətlərin Parlament Assambleyasına qoşulması ilə bağlı danışıqlar aparılır.
Müəlliflə əlaqə saxlamaq üçün elektron ünvan : [email protected]
