Azərbaycan, Şəki, 23 iyun/ Trend , müxbir E.Quluyev/ Azərbaycanın şimal-qərbində yerləşən Şəki rayonunda külli miqdarda narkotik maddə aşkarlanıb. Qax rayon polis əməkdaşları və Daxili İşlər Nazirliyinin Narkotiklərlə Mübarizə İdarəsinin Qərb Regional Şöbəsinin əməkdaşları tərəfindən birgə aparılan əməliyyat nəticəsində iyunun22-nə keçən gecə saat 02:00 radələrində Şəki şəhər sakini 1965-ci il təvəllüdlü Ələsgər Mustafa oğlu Əhmədovdan 7 kq. 360 qr. narkotik vasitə olan marixuana götürülüb.
Trend -un arayışı: Daxili işlər orqanları tərəfindən bu ilin birinci rübündə qanunsuz dövriyyədən 181 kiloqramdan artıq (ötən ilin müvafiq dövrü ilə müqayisədə 2,5 dəfə çox) narkotik vasitə götürülüb, 41,5 kq-a yaxın (2,7 dəfə çox) narkotik vasitənin qaçaqmalçılıq yolu ilə respublikaya gətirilməsinin qarşısı alınıb.
Narkotiklərlə bağlı cinayətlərə görə məsuliyyətə cəlb olunmuş 400 nəfərdən 367-i (91,8%) əmək qabiliyyətli işləməyən və oxumayan, 101-i (25,3%) əvvəllər cinayət törətmiş şəxs, 7-i (1,8%) qadın, 1-i (0,3%) yetkinlik yaşına çatmayan şəxsdir.
Faktla baglı Azərbaycanın Cinayət Məcəlləsinin satış məqsədilə qanunsuz olaraq narkotik vasitələri və ya psixotrop maddələri əldə etmə və ya saxlama, hazırlama, istehsal etmə (234.4-cü) maddəsi ilə cinayət işi açılıb.
Şəki paytaxt Bakıdan 320 kilometr şimal-qərbdə yerləşir.
Məqalə müəllifi ilə əlaqə ünvanı: [email protected]