Fransa, Strasburq, 24 iyun / Trend , müxbir A.Məhərrəmli/ Avropa Şurası Parlament Assambleyasının (AŞPA) Monitorinq komitəsinin Azərbaycan üzrə həmməruzəçiləri ölkədə insan haqlarının vəziyyətindən narahatdırlar.
"Biz bu gün düşünməliyik ki, nəyə görə yenidən Azərbaycanla bağlı müzakirələr aparırıq. Çünki Azərbaycanda vəziyyət narahatlıq yaratmaqda davam edir" - deyə Azərbaycan üzrə həmməruzəçi Andres Herkel bu gün AŞPA-nın sessiyasında çıxışı zamanı bildirib.
Bu gün ASPA-nın birinci mövzusu "Azərbaycanda demokratik institutların fəaliyyəti" adli N11627 saylı hesabatın müzakirəsinə həsr olunub. İlk olaraq ASPA-nın Monitorinq Komitəsi adından Azərbaycan üzrə həmməruzəçilər Andres Herkel və Yevgeniya Jivkova çıxış ediblər. Həmməruzəçilər hesabatdakı əsas məqamlara nəzər saldılar.
Herkel bildirib ki, Azərbaycanla bağlı narahatlığı əsasən KİV-lərin azadlığına aiddir. Herkel bu sahədə vəziyyətin ürəkaçan olmadığını deyib. Onun fikrincə, bu kimi faktlar müsbət dəyişikliklərin edilməsinə mənfi təsir göstərə bilər.
"Bununla belə, "Sərbəst toplaşmaq azadlığı haqqında" Qanuna dəyişikliklərin qəbul edilməsini alqışlayırıq. Bu dəyişikliklər iki həftə əvvəl qəbul edilib və bu çox müsbət məqamdır" - deyə həmməruzəçi bildirib.
Herkel həmçinin qeyd edib ki, çirkli pulların yuyulması və terrorizmlə mübarizə sahəsində də qanunlar Azərbaycan parlamentində müzakirə edilir və bu qanunların da yaxın zamanda qəbul ediləcəyinə inanır.
"Əsas məqamlardan biri ölkənin Seçki Məcəlləsinə dəyişikliklər edilməsidir. Bu, həm bizim, həm də Venesiya Komissiyasının tövsiyələridir. Deməliyəm ki, başlıca tövsiyələrin heç də hamısı parlamentdə müzakirə edilməyib, seçki komissiyyalarının tərkibinin formalaşması sahəsində problemlər qalmaqdadır" - deyə Herkel çıxışında bildirib.
Həmməruzəçi jurnalistlərin həbs olunmasına da diqqət çəkib. Onun fikrincə, jurnalistlərin həbsi seçkiöncəsi münbit şərait yaratmır: "Doğrudur, qəzetlər nəşr olunur, lakin bu qəzetlərin işçiləri get-gedə ixtisara düşür. Ola bilsin ki, bu həbslərdə cinayət elementləri də var, lakin qəbul etməliyik ki, siyasi tərəfləri də mövcuddur. İlk növbədə bunun humanitar tərəflərini də nəzərə almalıyıq, unutmayaq ki həbs edilənlərin arasında xəstə olanlar da var" - deyə Herkel bildirib.
Digər həmməruzəçi Yevgeniya Jivkova isə bildirib ki, Azərbaycana iki dəfə səfərində (fevral və may) ölkədəki siyasi vəziyyətlə yaxından tanış olub. Bu səfərlərində prezident İlham Əliyevlə, jurnalistlərlə, QHT-lərlə, siyasi qüvvəllərlə görüşlər keçirdiklərini xatırladıb.
"Bildiyiniz kimi prezident 5 nəfər jurnalist də daxil olmaqla, 59 nəfəri əfv etmişdi. Bu da müsbət bir addımdır. Hesab edirəm ki, siz bu hesabatın balanslaşdırılmış xüsusiyyətini görəcəksiniz" - deyən xanım həmməruzəçi əlavə edib ki, Azərbaycanda növbəti seçkilərin daha demokratik şəraitdə keçiriləcəyinə ümid edir. O, hesabatın obyektiv olduğunu deyib.
Məqalə müəllifi ilə əlaqə saxlamaq üçün elektron ünvan [email protected]
