Gürcüstan, Batumi, 01 iyul/ Trend , müxbir Kirtsxaliya/ GUAM ölkələrinin sərhəd idarələri bu gün Batumidə 2009-cu il əməkdaşlıq planını imzalayacaqlar, - Trend -a çərşənbə axşamı Gürcüstan Sərhəd Polisinin mətbuat xidmətindən bildiriblər.
GUAM ölkələri başçılarının iyunun 30-da keçirilən sammiti çərçivəsində təşkilata daxil olan ölkələrin sərhəd idarələri başçılarının altıncı işgüzar görüşü öz işinə başlayıb. Görüşdə sərhədlərdəki vəziyyət müzakirə edilib, 2008-ci il üçün razılaşdırılan planla bağlı keçirilən birgə tədbirlər qiymətləndirilib.
Sərhəd idarələrinin başçıları GUAM üzv ölkələri prezidentlərinin sammitinin plenar iclasında da iştirak edəcəklər.
GUAM 1997-ci ildə Gürcüstan, Ukrayna, Azərbaycan, Moldovanın iştirakı ilə iqtisadi, ticari, nəqliyyat, təhlükəsizlik və digər sahələrdə əməldaşlıq məqsədi ilə yaradılan regional təşkilatdır. 1999-cu ildə bu formata Özbəkistan da daxil olub və təşkilat GUÖAM adlanmağa başlayıb. Lakin yeni üzv dövlət təşkilat orqanlarının işində fəal iştirak etmək istəməyib və 2005-ci ildə onu tərk edib. 2006-cı ildə Kiyevdə ilk sammit zamanı GUAM-ın beynəlxalaq təşkilat və "Demokratiya və iqtisadi inkişaf uğrunda təşkilat - GUAM" kimi elan olunması haqda qərar qəbul olunub.
