Azərbaycan, Bakı, 17 oktyabr / Trend , müxbir D.Xatınoğlu/ İran və Qərb arasında münasibətlərin gərgin olduğu bir vaxtda, İrana BMT Təhlükəsizlik Şurasının qeyri-daimi üzvü olmaq şansını vermək və rəsmi Tehranı beynəlxalq ictimaiyyətdən təcrid olunmasının qarşısını almaq, İranın Qərbə baxışlarını müsbət istiqamətdə dəyişdirə bilər.
Vaşinqtonda fəaliyyət göstərən Amerika-İran Şurasının (American-İranian Council) sədri Huşəng Əmir Əhmədi (Hooshang Amir Ahmadi) Trend -a açıqlamasında bildirib ki, Qərb fürsətdən istifadə edib, İrana BMT TŞ-nin qeyri daimi üzv olmasına imkan yaratmalıdır, bu halda, İran da Qərbə sarı müsbət addımlar atmağa meylli olacaq.
Oktyabrın 17-də BMT TŞ-nin növbəti qeyri-daimi üzvləri seçiləcək. Asiyadan İran və Yaponiya öz namizədliklərini elan ediblər.
Əhmədi hesab edir ki, Qərb çalışmalıdır ki İranı beynəlxalq ictimaiyyətdən təcrid etmək əvəzinə, bu ölkənin dünya ilə uyğunlaşmasına çalışmalıdır.
O əlavə edib ki, İranın Yaponiya ilə müqayisədə rəqabət aparmaq gücü yoxdur. Lakin əgər Yaopniya və Qərb srtateji baxımdan bir qədər düşünsələr, İrana udmaq şansını verməlidirlər.
BMT TŞ İranın uranın zənginləşdirilməsi prosesini dayandırması üçün indiyədək bu ölkə əleyhinə beş qətnamə qəbul edib, qətnamələrin üçündə rəsmi Tehrana iqtisadi sanksiyalar tətbiq olunub. İran bu qətnamələrə etinasız yanaşıb. Qərb, xüsusilə ABŞ İranın nüvə silahı istehsal etmək niyyətində olduğunu bildirir.
İran parlamentinin nümayəndəsi və İran-Azərbaycan Parlament Dostluq Komissiyasının sədri Musəvi Trend -a bildirib ki, BMT TŞ-yə üzv olmaq təkcə İranın deyil, bütün müsəlman ölkələrinin haqqıdır.
O hesab edir ki, İranın BMT Təhlükəsizlik Şurasına müvəqqəti üzvlüyü dünya müsəlmanlarının hüquqlarının müdafiəsi və onların səsinin dünyaya çatdırılması məqsədilə irəli sürülüb.
Musəvi cümə axşamı Trend -a bildirib ki, bəzi ölkələr (ABŞ) müharibə aparır və onların BMT TŞ -də "veto" hüququ olan müttəfiqləri də bunu sükutla qarşılayırlar: "Bu cür münasibət qanunsuz və məntiqsizdir".
Musəvi İranın nüvə proqramı ilə bağlı bildirib ki, hər bir ölkənin dinc məqsədlərə xidmət edən nüvə texnologiyasına sahib olmaq haqqı var. Əlbəttə, nüvə texnologiyası əldə etmək "kütləvi qırğın silahı"na sahib olmaq demək deyil. "Əslində, Qərbin "nüvə texnologiyası" anlayışı digər ölkələrə güc tətbiq etmək və kütləvi qırğın törətmək üçün vasitə ilə məhdudlaşır, amma biz bunu qəbul etmirik", - deyə Musəvi bildirib.
Musəvi əlavə edib ki, İran uranı zənginləşdirmək potensialına malikdir və bu məsələ ilə BMT Təhlükəsizlik Şurası yox, MAQATE məşğul olmalıdır.
MAQATE-nin Baş katibi Məhəmməd Əlbəradei sentyabr ayında yaydığı məruzədə bildirib ki, İranın nüvə proqramının hansı məqsəd daşıdığına aydınlıq gətimək mümkün deyil. Əlbəradei İranın MAQATE ilə yetərincə əməkdaşlıq etməməsini mənfi qiymətləndirib.
İran rəsmiləri bildirirlər ki, nüvə proqramını elektrik enerjisi istehsalı məqsədilə davam etdirirlər və bu proqram hərbi məqsəd daşımır. İran uranın zənginləşdirilməsini öz qanuni haqqı hesab edir.
Məqalə müəllifi ipə əlaqə ünvanı: [email protected]