Əfqanıstan, Kabil, 03 noyabr / Trend , müxbir A.Həkimi/ Əfqanıstanın səhiyyə və mədəniyyət sahəsində inkişafın nəzərə çarpmasına rəğmən, hazırda ölkədəki mövcud durum və əksər sahələrdə müşahidə olunan gərginliklər Əfqanıstan hakimiyyətinin uğurlarını kölgə altına salır.
"Hakimiyyətin uğurları onun uğursuzluqları ilə müqayisədə gözə görünmür", - deyə əfqan deputat Məhəmməd Əli Cəbraili Trend -a bildirib.
Asiya Fondu tərəfindən Əfqanıstan əhalisi arasında sorğu keçirilib. Sorğunun nəticələrinə görə, Əfqanıstan xalqının hökumətdən narazılığı ötən illə müqayisədə iki dəfə artıb. Sorğuda Əfqanıstanın 34 vilayətindən 6 min nəfər iştirak edib.
"Əfqanıstan hökuməti hərbi, siyasi, iqtisadi, təhlükəsizlik və ictimai sahələrdə uğur qazana bilməyib", - deyə Cəmraili bazar ertəsi Trend -a bildirib. Cəbraili bildirib ki, mədəniyyət sahəsində hökumət daha fəal işləyib.
Cari ildə Əfqanıstan Mədəniyyət Nazirliyi tərəfindən nəşr edilən kitabların sayı 60 milyon olub. Bundan başqa, bu ölkənin hər bir vilayətində yeni maarif evləri təşkil edilib.
Cəbrailinin sözlərinə görə, yenidənqurma işlərində də hökumət bir o qədər fəal olmayıb. "Fikrimcə, hökumətin ümumilikdə bütün sahələr üzrə fəaliyyətini uğursuz adlandırmaq olar", - deyə Cəbraili bilidirib.
Herat vilayətinin Əfqan Partiya Şurasının katibi Məhəmməd Məruf Fəzli Trend -a bildirib ki, Hamid Kərzai ölkə prezidenti seçildikdən sonra ölkənin müxtəlif sahələrində dəyişikliklər və islahatlar aparılmağa başlanıb.
"Əfqanıstanın əsas yollarının təmiri və informasiya texnologiyasının inkişaf etdirilməsi ilə hökumət əhalinin yalnız iki problemini həll etmiş oldu", - deyə Fəzli bildirib. O əlavə edib ki, bu nailiyyətlərlə yanaşı, ölkədə hələ çox sayda problemlər qalmaqdadır.
Onun sözlərinə görə, Əfqanıstan 30 illik müharibə nəticəsində kasıb bir ölkəyə çevrilib və bu səbəbdən ölkənin iqtisadi və ictimai sahələrində yaranmış problemlərin həlli hökumətə çətinlik yaradır. Fəzlinin fikrincə, ölkədə təhlükəsizliklə bağlı yaşanan problem hökumətin fəaliyyətində əsas maneələrdən biridir.
O əlavə edib ki, Hamid Kərzai ölkədə sabitliyin təmin olunmasında böyük rol oynaya bilər, lakin bu yolda digər rəsmilərin də onu dəstəkləməsi lazımdır.
"Hökumətin digər problemi isə dövlət strukturlarında korrupsiya və rüşvətxorluğun artması ilə bağlıdır", - deyə Fəzli bildirib.
Məhkəmə, polis və digər dövlət strukturlarındakı korrupsiya və rüşvətxorluq halları ölkədə təhlükəsizliyin pozulmasının daha bir səbəbidir.
Asiya Fondu tərəfindən keçirilən sorğda iştirak edənlərin 38 faizi dövlətin düzgün siyasət yürütdüyünü, 32 faizi isə düzgün siyasət yürütmədiyini bildirib.
Fondun ötən ilki sorğusunda isə iştirakçıların 42 faizi dövlətin siyasətini dəstəkləmiş, 24 faizi dəstəkləməmişdi.
Sorğuda təhlükəsizlik, iqtisadi və digər sahələr üzrə hökumətin fəaliyyətinin qiymətləndirilməsi aparılıb. Sorğuda iştirak edənlər korrupsiya və qiymətlərin artması kimi problemlərin həll olunmamasını qeyd etməklə yanaşı, ölkədə mədəniyyət və səhiyyə sahələrində əldə olunmuş nailiyyətləri alqışlayıblar.
Məqalə müəllifi ilə əlaqə: [email protected]
