Azərbaycan, Bakı, 12 yanvar / Trend , müxbirA.Hüseynbala/ Azərbaycanın müxalif Demokrat Partiyası müxalifətin referendumla bağlı vahid təşəbbüs qrupunu yarada bilməməsinə təəssüflənir.
"Müxalifətin vahid təşəbbüs qrupunun yaradılmamasının əsas səbəbi siyasi qüvvələr arasındaki qarşılıqlı etimadsızlıqdır. Ona görə bəzi adamlar hamının bir yerə yığışmasında tərəddüd edirlər", - bazar ertəsi Trend -a müxalif Azərbaycan Demoikrat Partiyasının (ADP) sədri Sərdar Cəlaloğlu biidirib.
Trend - un arayışı: Azərbaycanın hakim partiyası "Yeni Azərbaycan", müxalif Müsavat Partiyası "Respublikaçılar" referendum üzrə təşəbbüs qrupları yaradıblar. Mərkəzi Seçki Komissiyası YAP-ın təşəbbüs qrupunun qeydə alınması üçün bildiriş verib.
Bundan əlavə, "Azadlıq" blokuna daxil olan Xalq Cəbhəsi, Milli Birlik Hərəkatı, Vətəndaş və İnkişaf partiyaları, o cümlədən "Azərbaycan Naminə" İctimai Birlik, Demokrat Partiyası və bir sıra qeyri-hökumət təşkilatları "Respublika və Qarabağ Uğrunda Vətəndaş Hərəkatı" təşəbbüs qrupunun yaradılması barədə qərar veriblər.
Hakim partiyanın icra katibinin müavini Mübariz Qurbanlı əvvəllər Trend -a bildirib ki, müxalifət partiyalarının referendum əleyhinə yaratdıqları təşəbbüs qrupları səmərəsiz olacaq.
Yanvarın 10 - da 21 media rəhbəri referendumu dəstəkləmək məqsədilə "Azad söz" Təşəbbüs Qrupu təsis edib.
Həmin gün Azərbaycan Həmkarlar İttifaqları Konfederasiyası (AHİK) və bir sıra QHT-lər də Konstitusiyaya əlavə və dəyişikliklərə dair referendumla bağlı İctimai Təşkilatların Təşəbbüs Qrupunu təsis ediblər.
Yanvarın 12-də müxalif partiyaların digər bir hissəsinin təmsil olunduğu Demokratiya Uğrunda İttifaq "Cümhuriyyət Uğrunda Hərəkat" adlı təşəbbüs qrupu yaratmaq haqda qərar qəbul edib.
Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib. Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995 - ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib.
Cəlaloğlunun sözlərinə görə, "Respublika və Qarabağ Uğrunda Vətəndaş Hərəkatı" siyasi partiyaların yox, ayrı-ayrı vətəndaşların qurumudur. "Biz orada partiya sədri kimi yox, vətəndaş kimi üzv olacağıq", - Cəlaloğlu vurğulayıb.
ADP sədri deyib ki, ayrı - ayrı şəxslər istənilən qədər təşəbbüs qrupları yarada bilər. "Amma biz istəyirdik ki, müxalifət referendumla bağlı vahid mövqedən çıxış etsin.
Çünki gələcəkdə hüquqi prosedurlar qaydasında işi davam etdirmək lazım olacaqsa, vahid mövqe vacibdir", - müxalif partiya sədri əlavə edib.
O qeyd edib ki, hər bir təşəbbüs qrupunun əldə edəcəyi faktlar əsasında başlanacaq hüquqi prosedurlar bir qədər dolaşıqlığa səbəb olacaq.
Sаğ təmаyüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. 2008-ci ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq, keçmiş sədr Rəsul Quliyev və tərəfdarları ADP-dən imtina edib, Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]
