Azərbaycan, Bakı, 11 noyabr / Trend , müxbir M.Əliyev/
Azərbaycan və İordaniya hökumətləri iqtisadi əməkdaşlığın gələcək perspektivlərini müəyyənləşdirəcəklər. Danışıqlar Azərbaycan və İordaniya arasında iqtisadi əməkdaşlıq üzrə hökumətləraası komissiyasının ikinci iclası çərçivəsində keçiriləcək. Bu barədə Trend -a Azərbaycanın İordaniyadakı səfiri Elman Araslı bildirib.
"Hazırda iclasın keçirilmə tarixi dəqiqləşdirilir", - səfir deyib.
Hökumətlərarası komissiyanın iclasında ticarət və iqtisadiyyat, sənaye və energetika, rabitə və telekommunikasiya texnologiyaları, kənd təsərrüfatı, gömrük işi, nəqliyyat, o cümlədən mədəniyyət və turizm, elm və təhsil, səhiyyə və digər sahələrdə əməkdaşlıq məsələləri müzakirə olunacaq. Qarşılıqlı maraq kəsb edən məsələlər üzrə fikir mübadiləsi aparılacaq.
Azərbaycan-İordaniya hökumətlərarası komissiya 2007-ci ilin iyulunda yaradılıb. Azərbaycan tərəfindən komissiyaya iqtisadi inkişaf naziri Şahin Mustafayev, İordaniyadan isə komissiyaya bu ölkənin sənaye və ticarət naziri Əmir Hədidi başçılıq edəcək.