Azərbaycan, Bakı, 1 aprel /Trend, müxbir K.Zərbalıyeva/
Azərbaycan penitensiar müəssisələrində cari ilin birinci rübündə narkotiklərin qanunsuz dövriyyəsi ilə bağlı 10 fakt aşkarlanıb.
Ədliyyə Nazirliyi Penitensiar Xidmətinin ictimaiyyətlə əlaqələr şöbəsindən cümə axşamı Trend-ə verilən məlumata görə, həmin faktlar əsasında 50 qrama yaxın heroin, 4 qram marixuana, 10 qramdan çox tiryək müsadirə olunub.
Xidmətdən bildirilib ki, Novruz Bayramı günlərində - martın 24 və 28-də 6 saylı cəzaçəkmə müəssisəsində müəssisəyə narkotik vasitələrin keçirilməsinin qarşısı alınıb.
Keçirilmiş tədbirlər nəticəsində 46,4 qram heroin götürülüb.
Martın 19-da Qobustan həbsxanasında, 25-də isə 2 saylı cəzaçəkmə müəssisəsində məhkumlara mobil telefonların ötürülməsinin qarşısı alınıb.
Aşkar olunmuş faktlarla bağlı materiallar aidiyyətı istintaq orqanlarına göndərilib.