Bakı Şəhər Baş Polis İdarəsi və Bakı Şəhər Prokurorluğu müxalifətin qanunsuz aksiyası ilə bağlı birgə məlumat yayıb.
Özünü İctimai Palata adlandıran quruma daxil olan ayrı-ayrı radikal müxalifət partiyalarının üzvləri 2011-ci il iyunun 19-da paytaxtın müxtəlif yerlərində toplantıların təşkili və keçirilməsi qaydasını və ictimai asayişi pozan hərəkətlərə yol vermişlər.
Əksəriyyəti "Müsavat" və "Azərbaycan Xalq Cəbhəsi" partiyalarının üzvləri olan bu qanunsuz aksiyanın iştirakçıları saat 17.00-dan başlayaraq ayrı-ayrı kiçik qruplarla əhalinin dincliyini, hüquq və azadlıqlarını, şəhər nəqliyyatının normal fəaliyyətini pozmuş, onları hüquq qaydasına riayət etməyə dəvət edən polis əməkdaşlarına müqavimət göstərmiş, xırda xuliqanlıq əməlləri törətmişlər.
Görülmüş tədbirlərlə ümumi sayı 80 nəfərədək olan aksiya iştirakçılarından toplantıların keçirilməsi qaydasını pozmuş, polis işçisinin qanuni tələbinə qəsdən tabe olmama və xırda xuliqanlıq xətaları törətmiş 23 nəfəri saxlanılmışdır. Onların əməlləri qanunla müəyyən edilmiş tədbirlərin görülməsi üçün sənədləşdirilərək 10 nəfər barədə toplanmış materiallar aidiyyəti məhkəmələrə göndərilmiş, daha 13 nəfər haqda ərazi polis orqanlarında müvafiq qərarlar qəbul edilmişdir.