Azərbaycan, Bakı, 19 mart /Trend müxbir S. Ağayeva/
Azərbaycan və ABŞ arasında ikitərəfli strateji tərəfdaşlığın möhkəmlənməsi hər iki ölkənin uzunmüddətli milli maraqlarına cavab verir. Bu barədə bazar ertəsi Azərbaycanın ABŞ-dakı səfiri Elin Süleymanov Azərbaycan və ABŞ arasında diplomatik münasibətlərin qurulmasının 20 illiyi ilə bağlı Trend-ə müsahibəsində bildirib.
"Son 20 il ərzində Azərbaycan-ABŞ münasibətlərinin uğurları göz qabağındadır. İlk növbədə bu, hər iki tərəfin ikitərəfli strateji tərəfdaşlığın hər bir ölkənin uzunmüddətli milli maraqlarına cavab verməsini anlamasını əks etdirir", - Elin Süleymanov deyib.
Səfir qeyd edib ki, məhz bundan çıxış edərək Azərbaycanın ümummilli lideri Heydər Əliyev bizim münasibətlərimizin əsasını və həlledici istiqamətlərini müəyyənləşdirib.
ABŞ Dövlət Departamenti və səfirlik diplomatik münasibətlərin 20 illiyi ilə əlaqədar Vaşinqtonda birgə qəbul keçiriblər. Qəbulda Dövlət katibinin müavini Filip Qordon çıxış edib. "Həm mövcud tədbirin birgə keçirilmə faktının özü, həm də Birləşmiş Ştatlar tərəfinin yüksək səviyyədə təmsil olunması ABŞ həmkarlarımızın Azərbaycanla münasibətlərə verdiyi önəmdən xəbər verir" , - səfir vurğulayıb.
Gələcək planlardan danışan səfir deyib ki, "münasibətlərin geniş palitrasını nəzərə almaqla, onların gələcək inkişafını təhlükəsizlik və iqtisadiyyat məsələlərindən tutmuş mədəniyyət mövzusuna qədər bütün sahələrdə görmək istəyirik".
"İldən-ilə Azərbaycan reallıqları, xüsusən Xocalı faciəsi və Azərbaycan xalqının davam edən ağrısı haqqında daha çox amerikalı öyrənəcək. Bu proses həm federal səviyyədə, həm də ştatlar və yerli hakimiyyət orqanları səviyyəsində gedir", - Süleymanov bildirib.
Onun sözlərinə görə, Xocalı faciəsinin 20 illiyində Azərbaycan diasporu və ictimai təşkilatları tərəfindən böyük maarifləndirici iş həyata keçirilib. Bunların nəticəsində Konqresin bir sıra nümayəndələrinin ştat və yerli hakimiyyət orqanları səviyyəsində bəyanatları, habelə KİV-də məqalələr dərc olunub. Bununla əlaqədar diplomat Azərbaycan və Türkiyə diasporlarının fəallarına, ictimai təşkilatlara və Azərbaycanın bütün dostlarına öz minnətdarlığını bildirib.
"Bununla yanaşı, bu gün dünyada mövcud məsələnin anlaşılmasının artmasında Leyla Əliyevanın "Xocalıya ədalət" beynəlxalq təşəbbüsünün rolunu qeyd etməmək olmaz" , - o qeyd edib.
"Təbii ki, Xocalı haqqında, erməni hərbi qüvvələrinin həyata keçirdiyi siyasi etnik təmizləmənin nəticələri və torpaqlarımızın davam edən qanunsuz işğalı haqqında həqiqətləri çatdırmaq hər bir azərbaycanlının vəzifəsidir. Bundan əlavə, ümid edirəm ki, Ermənistan-Azərbaycan münaqişəsi haqqında həqiqətin yayılması onun tezliklə nizamlanmasına kömək edəcək. Buna görə də, təkcə azərbaycanlılar və Azərbaycanın dostları deyil, həm də bu münaqişənin tezliklə həllini görmək istəyənlər obyektiv informasiyanı dünya ictimaiyyətinin diqqətinə çatdırmaqda dəstək göstərməlidirlər", - Süleymanov deyib.
Diplomat hesab edir ki, ABŞ-ın ATƏT-in Minsk qrupunun həmsədri kimi rolu və Cənubi Qafqazda strateji maraqları nəzərə alınmaqla, Birləşmiş Ştatlar tərəfinin fəallaşması hadisələrin təbii inkişafı olardı.
"Nəhayət ki, sadəcə həmsədrlərdən birinin və hətta ümumilikdə Minsk qrupunun fəallaşmasını deyil, münaqişənin həllində real irəliləyişi görmək istərdik" , - o qeyd edib.
