Dünya ictimaiyyəti dinc əhaliyə qarşı törədilmiş soyqırım və hərbi cinayətlərin qarşısını almalıdır. Trend bildirir ki, bu fikir fevralın 24-də Azərbaycanın xarici işlər nazirliyinin nəşr etdirdiyi "Diplomatiya dünyası" jurnalının xüsusi sayının xarici ölkə səfirləri və diplomatlarının, eləcə də beynəlxalq təşkilatların nümayəndələrinin iştirakı ilə keçirilən təqdimetmə mərasimində səsləndirilib.
Jurnalın növbəti sayı Xocalı faciəsinə həsr olunub. AR XİN-in şöbə rəisi Tofiq Musayev mərasimdə bəyan edib ki, bu faciənin törədilməsində Ermənistanın məsuliyyəti çoxlu sayda arxiv sənədləri və şahid ifadələri ilə təsdiq olunur. Onun sözlərinə görə, bu faciə məhz azərbaycanlıların soyqırımına yönəlib.
Azərbaycanın hərbi prokurorunun birinci müavini İlham Məmmədov bəyan edib ki, Xocalı faciəsi dinc əhaliyə qarşı yönəldilmiş Xolokost və digər dəhşətlərlə bir sıradadır. Onun sözlərinə görə, ölkənin hərbi prokurorluğunun apardığı istintaq materiallarına əsaslanan statistikaya əsasən erməni təcavüzü nəticəsində uşaqların, qoca və qadınların olduğu 4700-dən çox şəxs itkin düşüb, 1356 nəfər əsir götürülüb, 20 mindən çox insan həlak olub. O, qeyd edib ki, istintaq qrupu tərəfindən 600-dan çox cinayət işinə baxılıb.
Trend-in ən mühüm və maraqlı xəbərlərini "Telegram"da izləyin
