ADP-nin 9-cu Qurultayına hazırlıq üzrə Təşkilat Komitəsi Ali Məclisin sədri Akif Şahbazovu və onun tərəfdarlarını Ali Məclisin növbədənkənar iclasını keçirəcəyi təqdirdə məhkəməyə verəcək. Bu barədə Trend ə ADP Təşkilat Komitəsinin sədri Taliyət Əliyev məlumat verib.
Təşkilat Komitəsinin ADP daxilində baş vermiş qamaqallarla bağı yaydığı bəyanatında da bildirilib ki, partiyadan qovulmuş bir qrup şəxs və bəzi partiya üzvləri qondarma Ali Məclis çağırılması haqqında təşəbbüs qaldırıblar: "Təşkilat Komitəsi bu saxta iclası təşkil edənləri məhkəməyə verəcəyini, həmin iclasda iştirak edən ADP üzvləri haqqında sərt nizamnamə tədbirləri görəcəyini bildirir"-deyə bəyanatda vurğulanır.
Təşkilat Komitəsinin sədri həmçinin bildirib ki, son vaxtlar "Bakı xəbər" qəzetində ADP-nin bəzi rayon təşkilatlarının Ali Məclisinin 27 yanvar 2007-ci il tarixli qərarının əleyhinə olduqları və Rəsul Quliyevin bəyanatını müdafiə etdikləri ilə bağlı yazılanlar həqiqətə uyğun deyil: "Təşkilat Komitəsi bu məlumatların qəzetin redaksiyasında hazırlandığını bildirir və belə əməllərin cinayət xarakteri daşıdığını, məhkəmə qaydasında həll olunacağını bəyan edir"-deyə Təşkilat Komitəsi sədri vurğulayıb.
