Azərbaycan, Bakı /müxbir Trend İ.Əlizadə/Əli İnsanovun vaxtilə tənqid və təhqir etdiyi insanlarla bir yerdə olacağını bəyan etməsi və onlarla hansısa dialoqa getməsi siyasi riyakarlıqdan başqa bir şey deyil. Hakim Yeni Azərbaycan Partiyası (YAP) icra katibinin müavini, millət vəkili Siyavuş Novruzov keçmiş səhiyyə naziri Əli İnsanovun məhkəmə prosesində siyasi xarakterli bəyanatlar səsləndirməsinə münasibət bildirərkən qeyd edib ki, sabiq nazirə qarşı konkret ittihamlar irəli sürülüb və o, bunlara cavab verməlidir.
S.Novruzovun fikrincə, Ə.İnsanov müxtəlif fikirlər səsləndirməklə məhkəmə prosesini siyasiləşdirmək və ictimaiyyətin diqqətini ona qarşı irəli sürülən ittihamlardan yayındırmaq istəyir.
S.Novruzov bildirib ki, Ə.İnsanovun YAP haqqında səsləndirdiyi fikirlər həqiqətə uyğun deyil: "Əli İnsanov məhkəmədə bildirib ki, YAP-ın üçüncü qurultayında çıxış etdim, orada tənqidi fikirlər səsləndirdim. Lakin bunların hamısı yalnışdır. Əli İnsanov YAP-ın ücüncü qurultayında çıxış etməyib. Qurultayın materalları var və bunu sübut etmək çətin deyil", deyə YAP rəsmisi əlavə edib.
S.Novruzovun sözlərinə görə, sabiq nazir heç vaxt hakimiyyətin siyasətini tənqid etməyib. O, vurğulayıb ki, 8 ildir YAP İdarə Heyətində təmsil olunur və bundan əvvəl də Təşkilat Şöbəsinin müdiri kimi bütün iclaslarda iştirak edib və Əli İnsanovun tənqidi çıxışına rast gəlməyib: "Əksinə, Əli İnsanov istər Milli Məclisin deputatı olduğu dövrdə, istərsə də YAP-ı birinci və ikinci qurultayında və İdarə Heyətinin bütün iclaslarında çıxışlarını müxalifətə qarşı yönəldib. Məsələn, Rəsul Quliyevi "siyasi SPİD" adlandırırdı. İkinci qurultayda İsa Qəmbər haqqında çıxış edib və deyib ki, "İsa Qəmbər sən genetik xəstəsən. Çünki sənin genlərin xəstədir və sənin genlərin Yusif Məmmədəliyevə və başqalarına qarşı nə işlə məşğul olubsa, sən də indi həmin işlərlə məşğulsan". Rauf Arifoğlunu "neandertal" adlandıran Əli İnsanov olub. Bundan başqa hər imkan düşəndə jurnalistləri təhqir edib. Onun indi belə danışması və həmin şəxslərlə hansısa dialoqa getməsi siyasi riyakarlıqdan başqa bir şey deyil".
Millət vəkilinin sözlərinə görə, Ə.İnsanovun YAP-ın yaradıcıları haqqında dedikləri də həqiqətə uyğun deyil. Çünki nə Rəsul Quliyev, nə Lalə Şövkət Hacıyeva, nə də Fərhad Əliyev hakim partiyanın yaradıcılarından deyil: "Rəsul Quliyev 1995-ci ilin mart ayında YAP-a üzv olub. Bizim partiya yaradılanda Lalə Şövkət Moskvada idi. Rafael Allahverdiyev onun adının qiyabı olaraq təsis konfransında Siyasi Şura və İdarə Heyətinin üzvlərinin siyahısına daxil edib. Mən Naxçıvanda keçirilən təsis konfransında iştirak etmişəm. Amma heç Əli İnsanov təsis konfransında iştirak etməyib. Lakin özünün YAP-ın yaradıcısı adlandırır. Fərhad Əliyev 1999-cu ildə partiyanın birinci qurultayı ərəfəsində YAP-a üzv olub. Bütün bunlar onu göstərir ki, Əli İnsanovun dedikləri yalan, böhtan və iftiradan başqa bir şey deyil".
YAP rəsmisinin fikrincə, Ə.İnsanov özü-özünü ifşa edəcək və bir daha simasını ictimaiyyətə göstərəcək.
"Bu günkü müxalifət nə gündədirsə, Əli İnsanov onlardan pis vəziyyətə düşəcək", icra katibinin müavini qeyd edib.
S.Novruzov sabiq səhiyyə nazirinin həbsindən 7 ay əvvəl istefa ərizəsi yazdığı haqqında dediklərini də təkzib edib. Bildirib ki, YAP-ın 3-cü qurultayından əvvəl partiyanın İdarə Heyətinin iclası keçirilib. Əli İnsanov orada mətbuatdan şikayət edib, deyib ki, televiziyalar onu verlişlərə dəvət etmir, qəzetlərdə onun haqqında sifarişli yazılar təşkil edirlər. Ona da prezident İlham Əliyev Ə.İnsanova və başqa bir neçə nəfərə qapını göstərib: "Prezident dedi ki, hakimiyyətin siyasəti budur və kim istəmirsə gedə bilər. Əli İnsanov da səsini çıxarmadı və oturdu yerində. Bundan 10 gün sonra YAP-ın qərargahına gəldi və dedi ki, gedib prezidentdən bir daha üzr istədim ki, iclasda düzgün olmayan fikirlər işlətmişəm".
S.Novruzoa YAP daxilində Ə.İnsanovun rəqiblərinin olmasını təkzib edib və deyib ki, iqtidar vahid komanda kimi fəaliyyət göstərir: "Əli İnsanov öz xəyanətinin qurbanı olub. Kimsə hakimiyyətə xəyanət edibsə, bunun günahını başqa yerdə axtarmamalıdır".