Azərbaycan, Bakı / Trend müxbir S.İlhamqızı/ Mayda Samux rayonunda yeni yaradılmış Heydər Əliyev parkı və muzeyinin açılış mərasimi olacaq. Bu barədə Trend ə Samux Rayon İcra Hakimiyyətinin başçısı Vilyam Hacıyev məlumat verib.
İcra başçısının sözlərinə görə, Samuxda yeni Konserv Zavodu da tikilib. Hazırda isə uşaq-əyləncə mərkəzi inşa edilir və yaxın bir ay ərində tikinti işləri başa çatdırılacaq. V.Hacıyevin sözlərinə görə, rayonda işsizlik problemi də aradan qaldırılıb: "Samux aqrar rayon olduğu üçün hər bir hektar sahəyə iki nəfər işçi düşür. 2006-cı ildə min hektar yeni üzüm bağı salındı və burada iki min insan işlə təmin edildi. Onların minimum əməkhaqqı yüz manat təşkil edir".
V.Hacıyev əlavə edib ki, Samuxda Qarabağ müharibəsi əlilləri üçün yeni bina tikilir və işlər başa çatdırılmaq üzrədir. Yaxın zamanda həmin binanın, uşaq əyləncə mərkəzinin, Heydər Əliyev parkı və muzeyinin açılışı olacaq.