Azərbaycan, Bakı / Trend müxbir S.İlhamqızı/ Azərbaycanın müxalifətyönlü Vətəndaş Həmrəyliyi Partiyasının (VHP) 2008-ci ildə keçiriləcək prezident seçkilərində iştirak etməsi barədə partiyanın qurultayında qərar çıxarılacaq. Bu barədə VHP-nin sədri Sabir Rüstəmxanlı bazar ertəsi açıqlama verib.
Onun sözlərinə görə, VHP-nin növbəti qurultayı oktyabr ayında keçiriləcək. Qurultayda Azərbaycandakı ictimai-siyasi durum, qarşıdan gələn prezident seçkiləri müzakirə olunacaq, partiyanın Nizamnaməsinə dəyişikliklər ediləcək, VHP-nin rəhbər strukturlarına, sədrliyə seçkilər keçiriləcək.
Rüstəmxanlının sözlərinə görə, qurultay VHP-nin prezident seçkilərində öz namizədi ilə iştirak etməsinə dair qərar çıxara bilər: "Bu qərarı partiyanın Ali Məclisi, Siyasi Şurası da verə bilər. Amma qurultay gələnilki seçkiləri müzakirə edəcək. Vətəndaş Həmrəyliyi Partiyası istənilən halda prezident seçkisində iştirak edəcək. Amma öz namizədinin olub-olmayacağına hələ qərar verilməyib" - deyə VHP sədri bildirib.
Qeyd edək ki, VHP sədri, millət vəkili Rüstəmxanlı 2003-cü ildə keçirilmiş prezident seçkilərində prezidentliyə namizəd olub. Rəsmi məlumatlara əsasən, o, həmin seçkidə topladığı səslərin faizinə görə namizədlər arasında beşinci yerdə olub.