Azərbaycan, Bakı / Trend müxbir K.Zərbalıyeva/ Prokurorluq orqanlarına işə qəbul olmaq istəyən şəxslər üçün 80 ştat vahidi üzrə elan edilmiş test imtahanı və söhbətdən ibarət müsabiqəyə yekun vurulub. Respublika Prokurorluğundan Trend ə verilən məlumata görə, test imtahanını müvəffəqiyyətlə vermiş namizədlərin hazırlığını, dünyagörüşünü, məntiqi düşünmə qabiliyyətini, prokurorluqda işləmək üçün zəruri olan digər şəxsi keyfiyyətlərini müəyyən etmək məqsədi ilə mayın 23-dən iyunun 29-dək Baş Prokurorluğun müsabiqə komissiyası tərəfindən həmin namizədlərlə söhbət aparılıb.Namizədlərin test imtahanında və söhbətdə topladığı keçid ballarının cəmlənməsi yolu ilə 39 namizədin prokurorluğa işə qəbul olunması tövsiyə edilib və müvafiq vakant ştat vahidlərinə təyinat aparılması üçün baş prokurora təqdim edilib.
Ötən il noyabrın 25-də keçirilmiş test imtahanında 545 namizəd iştirak edib.
Qanunvericiliyin tələbinə uyğun olaraq test imtahanının nəticələrinə görə, 60 və daha artıq bal toplamış 303 namizəd müsabiqənin növbəti mərhələsinə buraxılıb. Qanunvericilikdə edilmiş dəyişikliklərə əsasən, 45 nəfərə həqiqi hərbi xidmət keçdikdən sonra müsabiqənin 2-ci mərhələsində iştirak edə biləcəkləri barədə müvafiq izahlar verilib.