Azərbaycan, Bakı/ Trend müxbir K.Zərbaliyeva/ Respublikada özəl notariatlar ilkin olaraq məhdud sayda yaradılacaq. Bu barədə şənbə günü jurnalistlərə açıqlamasında Ədliyyə Nazirliyinin Qeydiyyat və Notariat Baş İdarəsinin rəisi İlqar Məmmədov məlumat verib.
Özəl notariatların ilkin olaraq paytaxtda və respublikanın bəzi regionlarında yaradılacağını deyən idarə rəisi bildirib ki, bu proses mərhələ-mərhələ həyata keçiriləcək. Respublikada özəl notariatlar dövlət notariatları ilə müqayisədə üstünlük təşkil edəcək.
Respublikda 149 notariat ştatı mövcuddur. Aparılacaq islahatlar nəticəsində onların sayı 158-ə çatdırılacaq.
Özəl notariat institutunun Azərbaycanda yeni olduğunu deyən Məmmədov bu sahədə müəyyən problemlərin olacağını da istisna etməyib. Məmmədovun sözlərinə görə, Azərbaycanda 1864-cü ildən 1920-ci ilədək özəl notariat institutu olsa da, Sovet hakimiyyəti qurulandan sonra özəl notariatlar dövlət notariatları ilə əvəz olunub. "Bu təcrübə respublikamızda itirilib. Onun tətbiqi üçün müəyyən tədbirlərin həyata keçirilməsi zəruridir" - deyə idarə rəisi vurğulayb.
Dövlət notariatları ilə özəl notariatlar arasındakı fərqə toxunan Məmmədov bildirib ki, hər iki notariatın funksiyaları eyni olsa da, özəl notariatların apardıqları əməliyyatlara görə əldə etdikləri vəsait notariatın özünə məxsus olacaq. "Müvafiq dövlət rüsumları, vergilər ödənildikdən sonra qalan vəsait özəl notariatın sərəncamında qalacaq. Həmin vəsaitdən özəl notariatın işçilərinə fəaliyyətləri qiymətləndirilərək pul ödəniləcək" - deyə Məmmədov bildirib.
Aparılan notariat hərəkətləri barədə məlumat verən Məmmədov bildirib ki, notariat hərəkətlərinin əksəriyyəti kiçik əməliyyatlardır. "Daha çox imza, surət təsdiq olunur. Mürəkkəb əməliyyatlar arasında daşınmaz əmlakın alqı-satqısı müqavilələrinin təsdiqi xüsusi çəkiyə malikdir. Bu müqavilələrin sayı ilbəil artır. Xüsusən son dövrlərdə aparılan torpaq islahatları ilə bağlı torpaqların özgəninkiləşdirilməsi müqavilələrinin sayı artıb".
