Azərbaycan, Bakı, 06 mart / Trend , müxbir KZərbalıyeva/ "Azadlıq" qəzetinin baş redaktoru barəsində bəraət hökmünün çıxarılmasını xahiş edib.
Cümə axşamı Bakının Yasamal rayon məhkəməsində baş redaktor Qənimət Zahidin vəkilləri çıxış edib. Vəkillər baş redaktorun yazılarına görə həbs edildiyini bildirərək ona bəraət verilməsini istəyiblər.
Zahid son sözündə əsassız ittihamlarla həbs olunduğunu bildirib və özünü günahsız sayıb.
Digər təqsirləndirilən Vüsal Həsənov isə baş verən insidentin tam təsadüfi olduğunu deyib.
Baş redaktorun həbsinə noyabrın 7-si saat 16 radələrində "Azadlıq" qəzeti redaksiyasının yerləşdiyi "Azərbaycan" nəşriyyatının binası qarşısında baş vermiş insident səbəb olub. Sevgiladə Quliyeva və Vüsal Həsənov adlı iki nəfərlə Zahid arasında yaranan mübahisə əlbəyaxa dava ilə nəticələnib. Həmin gün Yasamal rayon Polis İdarəsinə müraciət edən Həsənov məhkəmə-tibb ekspertizasından keçib və ona kəllə-beyin travması aldığı barədə rəy verilib.
Baş redaktor Cinayət Məcəlləsinin qəsdən sağlamlığa az ağır zərər vurma və xuliqanlıq cinayətlərində şübhəli bilinərək noyabrın 11-də Bakının Yasamal rayon məhkəməsinin qərarı ilə 2 ay müddətinə həbs olunub.
Dövlət ittihamçısı çıxışında baş redaktora 5 il iş istəyib.
Məhkəmə yekun qərar qəbul etmək üçün müşavirəyə gedib.
