Azərbaycan, Bakı, 02 aprel / Trend ", müxbir E.Hüseynli/ Azərbaycan Ekologiya və Təbii Sərvətlər Nazirliyi tərəfindən (ETSN) Sumqayıtda yerləşən "Azbentonit" LTD müəssisəsində ekoloji nöqsanlar aşkar olunub və onların aradan qaldırılması üçün müəssisə rəhbərlərinə icra üçün "məcburi göstərişlər" verilib. Nazirliyin mətbuat xidmətinin rəhbəri vəzifəsini icra edən İradə İbrahimova çərşənbə günü Trend "a bildiriblər ki, ay ərzində ətraf mühitin mühafizəsinə nəzarət məqsədilə keçirilən reydlər zamanı bir sıra qanun pozuntuları aşkar edilib.
Mərkəzi ofisi Nyu-York şəhərində yerləşən Blacksmith İnstitutu tərəfindən tərtib olunan siyahıda Sumqayıt şəhəri ötən il dünyanın 33 ən çirkli şəhəri siyahısına daxil edilib.
Azərbaycanın Ekologiya və Təbii Sərvətlər Nazirliyi Sumqayıtın dünyanın 33 ən çirkli şəhəri siyahısına daxil edilməsinə narazılığını bildirib və bu barədə institut rəhbərliyinə etiraz məktubu göndərib.
İnstitutun tərtib etdiyi ən çirkli 33 şəhər siyahısına Rusiyanın 8, Hindistanın 6, ABŞ-ın 2, Rumıniyanın 2, Meksika, Çexiya, Ukrayna, Qırğızıstan, Filippin və s. ölkələrin hər birindən bir şəhər daxil edilib.
1990-cı ildə Sumqayıt şəhərinin atmosfer havasına 96,4 min ton çirkləndirici maddə atıldığı halda, bu göstərici 1995-ci ildə 40,2 min tona, 2000-ci ildə isə 17,6 min tona qədər azalıb.
1980-ci illərdə dənizə yüksək çirklilik dərəcəsinə malik 600 min kub.m axıntı suları axıdılırdısa, 2005-ci ildə bu göstərici 80,0 min kub.m olub. Qeyd olunan dövr ərzində bərk tullantıların miqdarı ildə 300 min tondan 3900 tona qədər enib.
Nazirlik mart ayı ərzində müəssisədə aşkarlanan ekoloji nöqsanlar barədə ətraflı məlumat verməyib.
ETSN mart ayı ərzində 39 müxtəlif təyinatlı kiçik həcmli fəaliyyət sahəsinə 14 695 manat 47 qəpik ödəniş haqqı tətbiq edib, 2266 manat 50 qəpik vəsaitin isə ekoloji fonda ödənilməsi təmin olunub.
Məqalə müəllifi ilə əlaqə ünvanı: [email protected]