Azərbaycan, Bakı, 23 may / Trend , müxbir K.Zərbalıyeva/ Prokuror Azərbaycan Xalq Cəbhəsi Partiyası sədrinin barəsindəki cinayət işinin xitam olunması barədə şikayətinin təmin olunmamasını məhkəmədən xahiş edib.
Cümə günü Bakının Nəsimi rayon məhkəməsində AXCP sədri Əli Kərimlinin barəsində rayon prokurorluğunda 1994-cü ildə Cinayət Məcəlləsinin qanunsuz silah-sursat saxlama maddəsilə açılan cinayət işinə xitam verilməsi ilə bağlı şikayəti üzrə proses başa çatıb.
Müxalifət liderinin vəkili bildirib ki, məhkəmə yekun qərarını mayın 26-da elan edəcək.
2006-cı ildə köhnə pasportun müddəti bitdikdən sonra Kərimli yeni pasport almaq üçün DİN Pasport Qeydiyyatı İdarəsinə müraciət edəndə ona bildirilib ki, haqqında Nəsimi rayon prokurorluğunda 1994-cü ildə Cinayət Məcəlləsinin qanunsuz silah-sursat saxlama maddəsilə açılan cinayət işinə xitam verilmədiyindən ona pasport verilə bilməz.
Vəkil deyib ki, cinayət-prosessual qanunvericiliyə görə, beş il müddətinə xitam verilməli olan bu cinayət işi 12 ildir açıq qalıb.
Nəsimi rayon məhkəməsi Kərimlinin şikayətini təmin etməmişdi.
Bu qərardan apellyasiya şikayəti verilmişdi və Apellyasiya Məhkəməsi Nəsimi rayon məhkəməsinin qərarını qüvvədə saxlamışdı.
Qərardan verilən kassasiya şikayətinə baxan Ali Məhkəmə işin cinayət icraatına aid olduğunu əsas gətirərək, şikayətə mülki mühakimə qaydasında baxılmalı olmadığından Apellyasiya Məhkəməsinin qətnaməsi ləğv etmişdi.
Ali Məhkəmənin qərarı ilə Kərimliyə məhkəmə nəzarəti qaydasında cinayət-prosessual qanunvericiliyin tələblərinə uyğun olaraq şikayət verə bilməsi izah olunub.
Müəlliflə əlaqə saxlamaq üçün elektron ünvan - [email protected]
