Azərbaycan, Bakı,29 iyul / Trend , müxbir K. Zərbalıyeva/ Bakı Apellyasiya Məhkəməsi qeydiyyatı ləğv olunmuş Seçki Monitorinq Mərkəzinin (SMM) apellyasiya şikayəti üzrə məhkəmə prosesini qeyri-müəyyən vaxtadək təxirə salıb.
Təşkilatın icraçı direktoru Anar Məmmədli Trend -a bildirib ki, buna səbəb onların Xətai rayon məhkəməsinin SMM-in qeydiyyatının ləğvi barədə qərarının dərhal icraya yönəldilməsindən Ali Məhkəməyə kassasiya şikayətləri vermələri olub.
Məmmədlinin sözlərinə görə, onlar məhkəmə qərarının dərhal icraya yönəldilməsindən narazı olublar və bu qərardan verdikləri apellyasiya şikayəti təmin olunmayıb.
Bakı Apellyasiya Məhkəməsi Ali Məhkəmənin bu şikayət üzrə qərar qəbul edənədək SMM-in şikayətinə baxılmasını təxirə salıb.
Mayın 14 - də Xətai rayon məhkəməsi Ədliyyə Nazirliyinin Qeydiyyat və Notariat Baş İdarəsinin müraciəti əsasında Seçki Mon itorinq Mərkəzinin qeydiyyatının etibarsız hesab edilməsi və ləğv olunması barədə qərar qəbul edib və qərarda onun dərhal icraya yönəldilməsi qeyd olunub.
SMM qeydiyyata alınması üçün təsis sənədlərini ilk dəfə 2006 -cı il martın 14 - də Ədliyyə nazirliyinə təqdim edib.
Nazirliyin müvafiq idarəsi texniki bəhanələr gətirərək, təsis sənədlərini qeydiyyata almayıb və SMM-in dövlət qeydiyyatına alınmaq üçün müraciətindən 5 dəfə imtina olunub.
Bu ilin fevralında isə, SMM dövlət qeydiyyatına alınıb.
Nazirlik SMM-in qeydiyyatının ləğvi barədə iddiasını təşkilatın təsis sənədlərində təsisçilər barəsində məlumatların qeyri-müəyyən olması, təşkilatın hüquqi ünvanının dəyişdirilməsi barədə məlumatın nazirliyə bildirilməməsi, SMM-in Azərbaycanın 8 şəhərində yerləşən nümayəndəlikləri barədə məlumatların dövlət reyestrinə daxil edilməməsi ilə əsaslandırıb.
Müəlliflə əlaqə saxlamaq üçün elektron ünvan - [email protected]
