Azərbaycan, Bakı, 12 fevral / Trend , müxbir K.Zərbalıyeva/ Avropa Məhkəməsinin icraatındakı şikayətlərin böyük qismi Rusiya, Türkiyə, Rumıniya və Ukraynaya qarşı verilib.
Trend -a Hüquq Maarifçiliyi Cəmiyyətindən verilən məlumata görə, bu barədə Insan haqları üzrə Avropa Məhkəməsinin ötənilki fəaliyyəti ilə bağlı yaydığı məlumatda qeyd olunub.
Məhkəmənin icraatında hazırda 97 min 300 iş var. Bunların 50%-dən çoxu 4 ölkəyə - Rusiya, Türkiyə, Rumıniya və Ukraynaya qarşı verilən şikayətlərlə bağlıdır.
Avropa Məhkəməsi 1998-ci ilə qədər (Avropa İnsan Hüquqları Komissiyasının fəaliyyət göstərdiyi dövr) ümumilikdə 45 min şikayətə baxıb, halbuki, təkcə 2008-ci il ərzində məhkəmə təqribən 50 min işə baxıb.
Hesabatda qeyd olunur ki, 2008-ci ilin sonuna doğru Gürcüstan və Rusiya arasında baş verən hərbi münaqişədən sonra məhkəməyə bu hadisələrlə bağlı 3 mindən çox müraciət daxil olub, və bu, məhkəmənin iş yükünü daha da ağırlaşdırıb.
2008-ci ilin yay hadisələri ilə əlaqədar olaraq Gürcüstan tərəfindən Rusiyaya qarşı dövlətlərarası şikayət də daxil olub.
Azərbaycan Avropa Şurasına 2001-ci ildə tamhüquqlu üzv qəbul edilib.
Azərbaycan parlamenti 1992-ci il yanvarın 24-də "xüsusi dəvət edilmiş qonaq" statusu almaq üçün AŞ-yə müraciət etmişdi.
Avropa Məhkəməsi indiyədək Azərbaycana qarşı 16 qərar qəbul edib.
Məqalə müəllifi ilə əlaqə ünvanı: [email protected]