Azərbaycan, Bakı, 27 yanvar / Trend , müxbir A.Hüseynbala/
Azərbaycanın Mətbuat Şurasına 2009-cu ildə 489 şikayət daxil olub
"Müraciətlərin 176-nı ayrı-ayrı vətəndaşlar ediblər. İdarə, müəssisə və təşkilatlarından 167, özəl müəssisələrdən 61, ictimai qurumlardan 45, yerli özünüidarəetmə orqanlarından 29 , siyasi partiyalardan 11 şikayət daxil olub", - Trend -un məlumatına görə, çərşənbə günü görülən işlərlə bağlı hesabatın təqdimatında Mətbuat Şurasının sədri Əflatun Amaşov bildirib.
Trend -un arayışı: Azərbaycanın Mətbuat Şurası indiyə qədər müxtəlif vaxtlarda "reket" fəaliyyəti ilə məşğul olan 94 qəzetin adını açıqlayıb.
Şuranın şikayətlər üzrə komissiyasının qərarı ilə "Naxçıvan press", "Kriminal aləm", "Radikal", "Avrotayms", "Taran", "Xüsusi təhqiqat", "Media Azərbaycan" və "İdeal" qəzetləri barədə olan materialların araşdırılması üçün hüquq-mühafizə orqanlarına müraciət olunub.
Amaşovun sözlərinə görə, daxil olan müraciətlərdən 267-i Şuranın Katibliyində həllini tapıb. 222 müraciət Şikayətlər üzrə Komissiyada araşdırılıb. 31 şikayətə isə İdarə Heyətində baxılaraq müvafiq qərarlar çıxarılıb. "Ötən il Bakıdan daxil olan şikayətlərin sayı 195 olub. Bölgələrə gəldikdə, ən çox şikayət Gəncə şəhərindən edilib. Lənkəran rayonundan daxil olan 16, Mincəçevir şəhərindən göndərilən 14, Sumqayıt şəhəri və Şəki rayonunun hər birindən daxil olan 13 şikayət araşdırılaraq müvafiq qərarlar qəbul olunub", - Şura sədri əlavə edib.
Şura sədri deyib ki, Şikayətlər üzrə Komissiyanın və "Reket" jurnalistikaya qarşı mübarizə Komissiyasının təqdimatı əsasında 2009-cu ildə dörd dəfə "reket nəşr"lərin adlarını açıqlayıb. "Fevral ayında 36, apreldə 19, iyunda 8, oktyabrda 5, dekabrda isə 8 KİV-in adı "qara siyahı"ya salınıb. MŞ-nin əvvəlki illərdə çıxardığı qərarlara əsasən, "reket nəşr" elan olunan 16 kütləvi informasiya vasitəsinin də adı siyahıya daxil edilib", - Amaşov vurğulayıb.
Amaşov qeyd edib ki, "Reket nəşr"lərə qarşı ictimai qınağın fəallaşdırılması məqsədilə ölkədə fəaliyyət göstərən yayım firmalarına və mətbəələrə məktublar göndərib. "Bu qərarın qəbulu zamanı həmin KİV-lərin "Azərbaycan Jurnalistlərinin Peşə Davranışı Qaydaları"na məhəl qoymamaları, etik prinsiplər və peşə əxlaqı ilə bir araya sığmayan hərəkətlərə yol vermələri, barələrindəki qərar və rəylərdən, tövsiyə və iradlardan nəticə çıxarmamaları əsas götürülüb", - o xatırladıb.
Şura sədrinin sözlərinə görə, 2009-cu il ərzində həbsdə olan jurnalistlərin azadlığa çıxmaları istiqamətində müxtəlif səviyyəli görüşlər keçirib. "Bununla yanaşı, MŞ İdarə Heyətinin üzvləri həbsxanalarda məhbus jurnalistlərin saxlanma şəraiti ilə yaxından tanış olublar. Bundan başqa, onların azadlığa çıxmaları üçün əlaqədar dövlət qurumlarına müraciətlər ünvanlanıb", - Amaşov bildirib.
Azərbaycanda dörd minə yaxın kütləvi infоrmаsiyа vаsitəsi qеydiyyаtdаn kеçib. Hаzırdа оnlаrdаn 600-ə yахını fəaliyyət göstərir. Təхminən 400-ə qədər qəzеt və jurnаl dərc оlunur, 8 ümumrespublika, 14 regional, 13 kabel televiziyası fəаliyyət göstərir. Аzərbаycаndа 50-yə yaxın elektron KİV, təxminən 20-i informasiya agentliyi vаr. Qalanları isə internet resurslarıdır.
Məqalə müəllifi ilə əlaqə ünvanı: [email protected]
