Azərbaycan, Bakı, 30 mart / Trend , müxbir A.Hüseynbala/
Azərbaycan Qılıncoynatma Federasiyasının baş katibi deyib ki, çempionata hazırlıq yüksək səviyyədə görülüb və turnirdə Ermənistan komandası iştirak etməyəcək.
"Bakıda qılıncoynatma üzrə yeniyetmələr və gənclər arasında aprelin 2-dən 10-na qədər keçiriləcək Dünya Çempionatında 87 ölkənin 1565 idmançısının iştirak edəcəyi nəzərdə tutulur. Ermənistan turnirə qatılmayıb". - Çərşənbə axşamı Beynəlxalq Xəbərlər Şirkətində keçirilən mətbuat konfransında Azərbaycan Qılıncoynatma Federasiyasının baş katibi Ramin Məmmədov bildirib.
Məmmədovun sözlərinə görə, aprelin 1-də Bakıda Beynəlxalq Qılıncoynatma Federasiyası Baş Assambleyasının iclası da keçiriləcək.
"Federasiyanın icraçı-direktoru Natali Rodriges artıq Bakıdadır və Dünya Çempionatına hazırlıq prosesinə nəzarət edir. Federasiyanın digər rəhbərliyi də paytaxtımıza gələcək", - baş katib əlavə edib.
Onun fikrincə, çempionatın rəsmi açılışı apelin 2-də saat 18:00-da Heydər Əliyev adına İdman və Konsert Kompleksində olacaq. "İlk üç gündə yeniyetmələr yarışacaqlar. Sonrakı üç gündə yarışlar gənclər arasında keçiriləcək. Bundan sonra isə komandalar arasında yarışlar baş tutacaq", - Məmmədov vurğulayıb.
Baş katib deyib ki, Ermənistanın Dünya Çempionatında iştirak etməməsinin əsas səbəbi Beynəlxalq Qılıncoynatma Federasiyasında qeydiyyatdan keçməməsi ilə bağlıdır.