Azərbaycan, Bakı, 12 aprel /Trend, müxbir M.Əliyev/
Rusiyanın Soçi şəhərində aprelin 16-dan 28-dək çimərlik futbolu üzrə Azərbaycan milli komandasının təlim-məşq toplanışı keçiriləcək. Hazırlıq prosesi çərçivəsində millimiz Rusiya klubları ilə yoldaşlıq görüşlərində qüvvəsini sınayacaq. Bu barədə bazar ertəsi Trend-ə Azərbaycan Futbol Federasiyaları Assosiasiyasından (AFFA) məlumat verilib.
Məlumata görə, təlim-məşq toplanışına dəvət olunan futbolçuların siyahısına Elvin Quliyev, Elnur Əhmədov, Emin Kürdov, İlqar Abdullayev, Renat Sultanov, Elşad Quliyev, Müslüm Hüseynov, Namiq İsgəndərov, İlham Əzizzadə, İlkin Hacıyev, Hikmət Bağırov, Seymur Məmmədov, Asif Zeynalov və Rövşən Hüseynli daxildir.