Bakı. Trend:
Muğanlı-İsmayıllı-Qəbələ avtomobil yolunun tikintisinin 2025-ci
ilin sonuna qədər yekunlaşması nəzərdə tutulub.
Trend xəbər verir ki, bunu Muğanlı-İsmayıllı-Qəbələ avtomobil
yolunun yenidən qurulması ilə bağlı növbəti ictimai dinləmədə
layihə icraçısı - “Gidrotransproyekt” Elmi-tədqiqat mərkəzinin
direktoru, “Evroskom” ASC-nin sədr müavini Natiq Əliyev deyib.
"Ağacların köçürülməsi və digər məsələlər zaman alır, lakin çalışacağıq ki, yolun tikintisi 2025-ci ilin sonuna qədər yekunlaşsın" - deyə o qeyd edib.
Xatırladaq ki, Bakı şəhərini İsmayıllı, Qəbələ, Oğuz, Şəki, Qax, Zaqatala və Balakən rayonları ilə birləşdirən ən qısa yol - Bakı-Şamaxı-Muğanlı-İsmayıllı-Qəbələ avtomobil yolunun Muğanlı-İsmayıllı-Qəbələ hissəsinin yenidən qurulması davam etdirilir. II texniki dərəcəyə uyğun qurulan yolun uzunluğu 9,7 km qısalaraq 76,8 km təşkil edəcək. Mövcud 2 zolaqlı yol genişləndirilərək 4 hərəkət zolağından ibarət olacaq. Layihə çərçivəsində ilk 14 km-lik hissə geoloji və hidrogeoloji cəhətdən daha mürəkkəb və sürüşmələrə ən çox məruz qalan hissəsi hesab olunur. Bu səbəbdən yolun uzunömürlü və davamlı olması məqsədilə sürüşməyə qarşı tədbirlər görülür. Bu çərçivədə 8 ərazidə ümumi uzunluğu 4 km olan svay istinad divarlarının, drenaj sistemlərinin tikintisi və digər mühəndis işlərinin icrası davam edir.