Gürcüstan, Tbilisi, 29 may /Trend, müxbir N.Kirsxaliya/
Gürcüstanın "Airzena" aviaşirkətinə məxsus təyyarə havaya qalxdıqdan yarım saat sonra Tbilisiyə geri qayıdıb.
Göyərtəsində futbol üzrə Gürcüstan millisinin oyunçuları olan təyyarə yerli vaxtla saat 11:30-da çarter reysi ilə Dublinə istiqamət alıb. Lakin havaya qalxdıqdan yarım saat sonra yenidən Tbilisi Beynəlxalq Hava Limanına enib.
Aviaşirkət hələlik rəsmi bəyanat vermir. Gürcüstan Futbol Federasiyasından (GFF) isə Trend-ə məlumatı təsdiqləyiblər.
GFF-dən təyyarənin hansı səbəbdən geri qayıtması barədə məlumata malik olmadıqlarını bildiriblər.
Qeyd edək ki, Gürcüstan futbolçuları İrlandiya milli komandası ilə iyunun 2-də keçirilməsi planlaşdırılan yoldaşlıq oyununda iştirak etmək məqsədilə Dublinə yola düşürdülər.