Bakı. Ənvər Məmmədov - Trend:
Avropa Yenidənqurma və İnkişaf Bankının (AYİB) 2017-ci ildə Azərbaycanda əsas prioriteti birbaşa maliyyələşdirmə vasitəsilə yerli korporasiyalara dəstək olmaq olacaq.
Bunu Trend-ə eksklüziv müsahibəsində AYİB-in Bakı ofisinin rəhbəri İvana Duarte deyib.
Onun sözlərinə görə, bank AYİB-in Azərbaycandakı tərəfdaş banklarını mikro, kiçik və orta müəssisələrin kreditləşdirilməsində və maliyyə vəsaitlərinə çıxışın yaxşılaşdırılması üçün yeni maliyyə alətlərinin hazırlanmasında dəstəyini davam etdirəcək. Məsələn, aqrar sənaye sektorundakı layihələr üçün.
"Biz həmçinin enerji layihələrinə investisiyaları davam etdirəcəyik, xüsusilə də səmərəliliyin və enerji təhlükəsizliyinin daha da artırılması üçün əsası olan enerji layihələrinə. AYİB əvvəlki kimi yol infrastrukturuna sərmayə qoyacaq, həmçinin təbii ehtiyatlar sahəsində işini davam etdirəcək", - Duarte deyib.
O, qeyd edib ki, AYİB Azərbaycanın maliyyə sektorunda vəziyyətin yaxşılaşdırılması istiqamətində də fəaliyyət göstərəcək:
"Əlavə səylər ölkənin maliyyə sektorunda vəziyyətin yaxşılaşdırılması üçün atılacaq, xüsusilə biznes mühitinin sabitləşdirilməsi məqsədi ilə kreditləşmə sahəsində etimadın artırılması üçün. AYİB həmçinin biznes mühitinin yaxşılaşdırılmasına yönələn struktur islahatlarının həyata keçirilməsi sahəsində hökumətlə işləməyi davam etdirəcək".
AYİB-in Bakı ofisinin rəhbəri bankın Azərbaycan üzrə portfeli və razılığı ötən il əldə olunmuş layihələr haqqında da danışdı:
"2016-ci ildə AYİB Azərbaycan ilə investisiyaların ümumi həcmi 59 milyon avro olan 9 layihə imzalayıb. İlin yekunlarına görə, bankın ölkədə ümumi portfeli 160 layihə təşkil edib, təmiz investisiya həcmi isə 3 milyard dolları keçib. Layihələrin əsas hissəsi enerji sektoruna düşür - onların portfeldə payı 43 faizə çatır. Sonra infrastrukturun inkişafı gəlir - bu sektorun bankın Azərbaycan üzrə portfelində 40 faiz təşkil edir. Qalan 17 faiz maliyyə sahəsinə, sənaye və xidmət sektoruna düşür".
Azərbaycanla AYİB ilə 1992-ci ildən əməkdaşlıq edir. AYİB-in əsas vəzifələrdən biri orta və kiçik özəl müəssisələrə investisiya qoyuluşu yolu ilə Azərbaycanın qeyri-neft sektorunun sabit inkişafını təmin etməkdir. Azərbaycan Cənubi Qafqazda AYİB-in ən iri benefisiarı sayılır. Azərbaycan MDB məkanında və Şərqi Avropa regionunda ən iri kredit götürənlərindən biridir.