Azərbaycan, Bakı / Trend S.Babayeva/ H5 virusunun daşıyıcısı ola biləcək köçəri quşların fəal miqrasiyası ilə əlaqədar Azərbaycanda "Quş qripi"nin qarşısının alınması üzrə aylıq monitorinqlərin sayı birdən ikiyə qədər artırıla bilər. Bu barədə çərşənbə günü Azərbaycan Kənd Təsərrüfatı Nazirliyi yanında Dövlət Baytarlıq Xidmətindən məlumat verilib.
"Bu məsələ gündəlikdədir və biz yaxın zamanlarda bunu müəyyən edəcəyik" - deyə Xidmətin məlumatında bildirilir.
Xidmətdən xəbər veriblər ki, köçəri quşların ən təhlükəli miqrasiya dövrü dekabrın ortalarından başlayır və yanvarın ortalarına qədər davam edir.
Hazırda son monitorinq zamanı toplanan çöl və ev quşlarının nümunələri üzrə laboratoriya araşdırmaları davam etdirilir. Nəticələr noyabrın 30-da açıqlanacaq.
Lakin Dövlət Xidmətindən qeyd ediblər ki, Abşeron yarımadası, Xəzər sahili zolaq, Dəvəçi, Salyan, Ağcəbədi və Lənkəranı əhatə edən monitorinq zamanı ilkin müşahidələr üzrə heç bir virus əlaməti aşkar olunmayıb.
Monitorinq, tərkibi Baytarlıq Xidməti, Ekologiya, Səhiyyə nazirlikləri və Azərbaycan Ovçular Cəmiyyətinin mütəxəssislərindən ibarət xüsusi komissiya tərəfindən aparılır.
Bu il Dövlət Xidməti Azərbaycanda 10 monitorinq həyata keçirib, 8 mindən yuxarı çöl və ev quşu nümunəsini tədqiq edib və onların heç birində virus daşıyıcısı aşkar etməyib.
Azərbaycanda 2005-ci ilin payızından tətbiq olunan çöl quşlarının istifadəsi və satışına qoyulan qadağa qüvvədədir. Ölkənin bütün sərhəd-keçid baytarlıq məntəqələri "Quş qripi"nin qarşısının alınması üçün gücləndirilmiş iş rejimində fəaliyyət göstərir.