Azərbaycan, Bakı, 09 fevral / Trend , müxbir İ.Xəlilova/ Azərbaycanın İqtisadi İnkişaf Nazirliyi yanında Dövlət Antiinhisar Xidməti ölkənin avtomobil bazarında fəaliyyət göstərən təsərrüfat subyektlərinin antiinhisar tələbləri və reklam qanunvericiliyinə uyğunluğunu araşdırmaq üçün monitorinqləri yenidən bərpa etmək niyyətindədir. Bu barədə Xidmət rəhbəri Samir Dadaşov məlumat verib.
"2008-ci il üçün işçi plan üzrə bu prosesin aprelin sonu-mayın əvvəlində başlanması gözlənilir" - deyə Dadaşov bildirib.
Avtomobil bazarında birinci monitorinq ötən il keçirilib. Bunun yenidən bərpa olunmasında məqsəd avtomobil servisi şirkətlərində aşkar edilmiş nöqsanların aradan qaldırılmasının yoxlanılmasıdır.
Monitorinqlər avtomobillərin satışı və texniki xidməti üzrə müəssisələri əhatə edib. Araşdırmalar nəticəsində bu kimi çatışmazlıqlar aşkar edilib: avtomobil satışı salonlarında qiymət göstəricisi, istismar qaydaları, istehlak xüsusiyyətləri, zəmanət öhdəlikləri olmayıb, istehlakçılara təqdim edilən zəmanət kitabçaları isə Azərbaycan dilində tərtib edilməyib. Eyni zamanda, şərtlərin istehsalçı-müəssisənin zəmanət tələblərinə uyğunsuzluğu faktı aşkar edilib.
İstehsalçılar konkret dövr ərzində tam zəmanət təmin edirlər, yerli müəssisələr isə müəyyən ehtiyat hissələrinə (mühərrik, arxa körpü, ötürücü qutu və s.) təminat verir.
Bununla yanaşı, istehlakçılarıın hüquqları məhdudlaşdırılır, belə ki, satıcılar müəyyən yollarla onların ehtiyat hissələrini yalnız bu avtomobil şirkətlərinin satış məntəqələrindən əldə etməyə çalışırlar. Məlumatda bildirildiyi kimi, bu antiinhisar qanunvericiliyinə ziddir. Bu faktların aradan qaldırılması üçün Antiinhisar Xidmət qanunvericiliyə uyğun tədbirlər həyata keçirir.