Azərbaycan, Bakı, 17 iyul/ Trend , müxbir İ.Xəlilova/Azərbaycanda orta aylıq əmək haqqının məbləği ilk yarımilin nəticələri üzrə 250,4 manat təşkil edib ki, bu da keçən ilin anoloji dövrünün məbləğindən 23,8 faiz çoxdur,- Dövlət Statistika Komitəsindən bildiriblər.
Ən yüksək əmək haqqı hasilat sənayesində, maliyyə fəaliyyəti sahəsində, daşınmaz əmlak əməliyyyatlarında, icarə və istehlakçı sahəsində xidmətlərin göstərilməsində və tikinti sektorunda işləyənlərdə qeydə alınıb.
Hesabat dövrü ərzində orta aylıq əmək haqqı əhalinin adambaşına aylıq pul gəlirlərini 41,8 faiz ötüb.
Yanvar-iyunda adambaşına nominal gəlirlər 1059,6 manat təşkil edib ki, bu da 2007-ci ilin anoloji dövrünün göstəricilərini 32,6 faiz üstələyir.Adambaşına real pul gəlirləri 33,8 faiz artımla 965,1 manat olub.
İlk yarımilin nəticələrinə görə, Azərbaycan əhalisinin nominal pul gəlirləri 9041,2 mln. manat olub ki, bu da keçən ilin göstəricisindən 34,2 faiz çoxdur. Bu müddət ərzində əhalinin real pul gəlirləri 35,3 faiz artımla 8235,5 mln. manata açtıb.
Hesabat dövrü ərzində əhali öz şəxsi gəlirlərindən mal və xidmətlərin alınmasına 67,9 faiz, vergilərin ödənilməsinə, sosial sığortaya və icbari üzvlük haqlarına 8,9 faiz, kapital yığımına və artırılmasına 23,2 faiz sərf edib.
İyulun 17-nə cari valyuta məzənnəsi 0,8058 AZN/USD təşkil edir.
