Azərbaycan, Bakı, 08 avqust/ Trend / Amerikanın "Boeing" şirkəti və "Azərbaycan Hava Yolları" QSC (AZAL) iki 737-900ERs və iki 767-300ER təyyarələrinin alınması üzrə müqavilənin müzakirəsini tam başa çatdırıb, - "Boeing"in rəsmi saytında yerləşdirilmiş məlumatda deyilir.
Sifariş $449 mln. dəyərləndirilib. Məlumatda deyildiyinə görə, Boeing 767 təyyarələrindən biri, əvvəllər sifariş edilmiş Boeing 787-nin əvəzidir.
"Azərbaycan Hava Yolları" ümumilikdə səkkiz "Boeing" təyyarəsi alacaq: dörd 737-900ERs, iki 787-8S və iki 767-300ERs.
AZAL-ın prezidenti Cahangir Əsgərovun dediyinə görə, təyyarələrin alınması "Boeing"lə möhkəm əməkdaşlıq istiqamətində atılmış daha bir addımdır.
"Biz "Boeing" təyyarələrindən ibarət parkımızı regionumuzun hava yolunda olan tələbatını ödəmək üçün əlavə 737 və 767s təyyarələrinin köməyi ilə qurmaq istəyirik", - Əsgərov bildirib.
2007-ci ilin əvvəlində Bakıda AZAL "Boeing" şirkətinin istehsalı olan beş təyyarənin alınması ilə bağlı saziş imzalayıb. Alınan təyyarələr içərisində iki Boeing 737-900 və üç müasir Boeing - 787 markalı təyyarələr var.
Boeing - 787 təyyarələri 2010-cu ildə gətiriləcək. Azərbaycan dünya və MDB məkanında bu növ təyyarələri alanlar sırasında birinci olacaq.