Azərbaycan, Bakı, 27 avqust/ Trend Cap , müxbir Ü.İsmayılova/ Azərbaycan prezidenti yanında Qeyri -Hökumət Təşkilatları (QHT) Şurası "Biotəbiətin mühafizəsi və müxtəlifliyi üzrə istehlak təşəbüsü" layihəsinin realizəsi üçün çərşənbə axşamı Azərbaycanın Azad İstehlakçılar Birliyinə altı min manat vəsait ayırıb, - Birliyin rəhbəri Eyyub Hüseynov çərşənbə günü bildirib.
"Layihənin realizə müddəti altı aydır", - o bildirib.
Hüseynovun sözlərinə görə, layihənin əsas məqsədi dövlət strukturları və əhalinin diqqətini ölkənin biotəbiətinin mühafizəsinə yönəltməkdir. Bununla əlaqədar təbliğat işləri, görüşlər aparılacaq, həm Bakı, həm də ölkənin bəzi regionlarında materiallar dərc olunaraq yayılacaq.
Birlik, layihənin realizəsi vaxtı biotəbiətin mühafizəsi üzrə ölkənin 2000 - ci ildə qoşulduğu beynəlxalq Konvensiyaların, həmçinin, AR-ın 2005 - ci ildə qoşulduğu Karfagen Protokolunun şərtlərinə riayət edəcək.
Hüseynovun sözlərinə görə, layihənin əsas bəndlərindən biri genetik baxımdan modifikasiya edilmiş məhsulların (GMM) tənzimlənməsidir və bu, prezidentin çərşənbə axşamı təsdiqlədiyi "2008 -2015 - ci illərdə Azərbaycan əhalisinin ərzaq məhsulları ilə etibarlı təminatı Dövlət Proqramı"nda da nəzərdə tutulub.
"Layihədə bu Dövlət Proqramının bəndlərinə lobbiçilik edəcəyik", - Hüseynov bildirib.
Ümumdünya Ərzaq Təşkilatının üzvü olan Azərbaycanın Azad İstehlakçılar Birliyi QHT 1997- ci ildən fəaliyyət göstərir.
Müəlliflə əlaqə saxlamaq üçün elektron ünvan: cap