...

Azərbaycanın Dövlət Torpaq və Xəritəçəkmə Komitəsi ərzaq təhlükəsizliyi üzrə dövlət proqramı çərçivəsində təkliflər hazırlayır

Biznes və iqtisadiyyat xəbərləri Materials 11 Sentyabr 2008 14:12

Trend-i buradan izləyin

Azərbaycan, Bakı, 11 sentyabr / Trend , müxbir Ü.İsmayılova/ "Respublikanın Dövlət Torpaq və Xəritəçəkmə Komitəsi "2008-2015-ci illərdə Azərbaycan əhalisinin ərzaq məhsulları ilə etibarlı təminatı dövlət proqramı" çərçivəsində hökumətə təqdim edilmək üçün təkliflər hazırlayır", - komitə rəhbəri Qərib Məmmədov ərzaq təhlükəsizliyi məsələsinə həsr olunmuş iclasda bildirib.

"Dövlət proqramı çərçivəsində Dövlət Komitəsinə 12 tədbir həvalə olunub", - o qeyd edib.

Məmmədovun sözlərinə görə, komitəyə torpaqların inventarlaşdırılması, torpaq kadastrı və digər tədbirləri həyata keçirmək tapşırılıb. Ərzaq təhlükəsizliyi üzrə dövlət proqramı çərçivəsində torpaq ehtiyatlarının yenidən qiymətləndirilməsi, səpin üçün yeni torpaq sahələrinin müəyyən edilməsi, keyfiyyət və həcm göstəricilərinin dəqiqləşdirilməsi, rayonlar üzrə elektron (rəqəmsal) torpaq-kadastr xəritəsinin hazırlanması, həmçinin bu istiqamətdə bir sıra digər tədbirlərin həyata keçirilməsi planlaşdırılır.

Proqram çərçivəsində əlavə olaraq əkinə 900 min hektara yaxın torpaq cəlb olunmalıdır. Bu istiqamətdə torpağın şorakətləşməsi, eroziyaya uğraması, şəhərləşmə prosesi ilə bağlı torpağın dövriyyədən çıxarılması və s. kimi təsirlərin qarşısının alınması komitəyə həvalə olunub.

"Tikinti, yeni yaşayış massivlərinin salınması, yolların çəkilməsi nəticəsində əkinə yararlı münbit torpaqlarımız dövriyyədən çıxarılır. Bu isə çox təhlükəli tendensiyadır", - Məmmədov bildirib.

Təkliflərin hazırlanması və bu istiqamətdə müvafiq işlərin görülməsi üçün xüsusi komissiya yaradılıb.

"2008-2015-ci illərdə Azərbaycan əhalisinin kənd təsərrüfatı məhsulları ilə etibarlı təminatı üzrə dövlət proqramı" ölkədə kənd təsərrüfatı məhsulları istehsalının stimullaşdırılması və yerli istehsal hesabına gələcəkdə əhalinin ərzaqla təminatının yaxşılaşdırılmasıdır. Tədbirlərin yerinə yetirilməsi üçün maliyyə mənbələri kimi dövlət büdcəsi, büdcədənkəanr fondlar, yerli büdcələr, daxili və əcnəbi birbaşa sərmayələr və digər mənbələr göstərilib.

Müəlliflə əlaqə saxlamaq üçün elektron ünvan: [email protected]

Xəbər lenti

Xəbər lenti