Azərbaycan, Bakı, 25 sentyabr/ Trend , müxbir Ü.İsmayılova/ Azərbaycanın sığorta bazarı 2008 - ci ilin sonunadək 30 - 35 faiz səviyyəsində proqnozlaşdırılan artım həcmini doğrutlmayacaq, -Azərbaycanın Maliyyə Nazirliyi Dövlət Sığorta Nəzarəti şöbəsinin rəhbəri Namiq Xəlilov cümə axşamı bildirib. Ölkənin bank sektoru tərəfindən istehlak kreditləşməsində məhdudiyyətlər sığorta bazarının artım templərinin azalmasının əsas səbəbi olub.
Bu gün Azərbaycanın əksər sığorta şirkətləri öz bizneslərini avtomobil sığortasında inkişaf etdirirlər. Sığortanın bu növü bütün sığorta bazarının təxminən 30 faizini təşkil edir. Kreditə avtomobillərin alınması isə, Azərbaycan bazarı üçün adi hala çevrilib. Bununla yanaşı, nəqliyyat vasitələri alıcısını kreditləşdirən bankların əsas tələbi onların sığorta etdirilməsidir.
Bir sıra avtodilerlərin rəyinə görə, bankların avtomobil kreditləşməsində məhdudiyyətlər tətbiq etmələri ilə əlaqədar, satışın ən azı 2 dəfə azalacağı gözlənilir. Əvvələr ölkədə minik avtomobillərinin 60 faizə qədəri bank kreditləri hesabına satılıb.
"Kreditləşmə templərinin azalmasının sığorta bazarında da öz əksini tapması ilə əlaqədar, ilin sonuna onun artım həcmini proqnozlaşdırmaq çətindir", - Xəlilov bildirib.
2007 -ci ildə Azərbaycanın sığorta bazarı 60 faizdən çox artıb, birinci yarımildə artım təxminən 30 faiz olub. Ən fəal artım Non - Life sığorta sahəsində, xüsusilə də birinci yarımilin yekunları üzrə həcmi 12,7 mln. manata çatan avtomobil sığortası üzrə müşahidə olunur.
Azərbaycanın Maliyyə Nazirliyinin məlumatlarına əsasən, yanvar - iyunun yekunları üzrə, Non-life sığorta 84 faiz, həyat sığortası 0,99 faiz, icbari sığorta növləri 10,99 faiz artıb. Birinci yarımilin yekunları üzrə sığorta haqlarının ümumi həcmi 36,1 faiz artıb.
Azərbaycanda ipoteka kreditləşməsinin templəri azalıb, bir sıra banklar borc vəsaitlərinin verilməsi üzrə əməliyyatları, ümumiyyətlə, dayandırıblar.
Buna baxmayaraq, Azərbaycan Milli Bankından (AMB) ipoteka kreditləşdirməsinin dayandırılması haqqında rəsmi göstəriş alınmayıb. Bankların kreditləşmə templərini azaltması, ilk növbədə, dünya maliyyə bazarlarındakı böhranla izah olunur. Belə vəziyyət bankları daha ehtiyatlı olmağa və müştəri bazasının formalaşdırılması zamanı sərt seçim aparmağa məcbur edir ki, bu da korporativ idarəetmə sisteminin bir hissəsidir.
Müəlliflə əlaqə saxlamaq üçün elektron ünvan: [email protected]