Azərbaycan, Bakı, 07 oktyabr/ Trend , müxbir N.İsmayılov/Çərşənbə axşamı ərzaq məhsullarının təhlükəsizliyinin və keyfiyyətinin yaxşılaşdırılması, eləcə də balıq məhsullarının sertifikatlaşdırılması tələblərinin texniki və qanunvericilik amillərinin təmin edilməsi üzrə tvininq-layihənin təqdimatı keçirilib. Layihə Avropa İttifaqının TACIS Proqramının 2006-cı il üçün olan büdcəsi çərçivəsində həyata keçirilir.
Layihə üzrə tərəfdaş ölkələr qismində Hollandiya və Latviya seçilib. Onların analoji istiqamətdəki təcrübəsi Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti tərəfindən mənimsəniləcək. Dəyəri 1 mln.avro olan layihənin həyata keçirilmə müddəti iki ildir.
"Bu layihə həm Azərbaycan, həm də Avropa ictimaiyyəti tərəfindən yüksək qiymətləndirilib, çünki bu, Aİ ilə əməkdaşlığa daha bir addımdır. Layihənin böyük əhəmiyyəti balıq ehtiyatlarının Azərbaycanın əsas resurslarından biri olması ilə də bağlıdır", - tədbirdə Azərbaycan iqtisadi inkişaf nazirinin müavini Niyazi Səfərov deyib.
Onun sözlərinə görə, Azərbaycan uzun müddətdir ki, balıq məhsullarının Avropa bazarlarına ixrac edilməsinə xidmət edən çoxlu məqsədəyönlü tədbirlər həyata keçirir. Bu istiqamətdə bir neçə prezidenti fərmanı olub. Fərmanlar çərçivəsində Azərbaycanın İqtisadi İnkişaf Nazirliyi Avropa İttifaqına ərzaq məhsullarının ixracının təmin edilməsi üzrə səlahiyyətli orqana çevrilib.
Nazirliyin əsas vəzifələri sırasında - ərzaq məhsulları, o cümlədən balıq məhsulları istehsal edən müəssisələrin Aİ - nin tələb və standartlarına cavab verən müvafiq səviyyəyə çatdırılması, risklərin azaldılması və idarə edilməsi üzrə işlərin görülməsi yer alıb.
"Bu istiqamətdə çoxlu müxtəlif tədbirlərin görülməsinə ehtiyac var və ümumilkdə bu sahədə işləyən insanların potensialı möhkəmlənməlidir. Bu, Azərbaycanın ixrac imkanlarının Avropa bazarlarına genişləndirilməsinə kömək edər", - Səfərov qeyd edib.
"Avropa bazarı çox genişdir və müvafiq olaraq, onun böyük tələbatı var, buna görə də hesab edirəm ki, Azərbaycandan balıq məhsullarının tədarükünə ehtiyac var", - layihənin icrasına məsul olan Cerard Rossink (Gerard Roessink) deyib.
