Azərbaycan, Bakı, 15 noyabr / Trend , müxbir N.İsmayılova/ İslam İnkişaf Bankının (İİB) İcraçı Direktorlar Şurası dünya maliyyə böhranının islam maliyyə sənayesinə və üzv ölkələrin iqtisadi sisteminə təsirini öyrənmək üçün ekspertlərdən və iş adamlarından ibarət monitorinq qrupunun yaradılmasına razılıq verib.
Monitorinq qrupu ölkələrin böhrandan çıxması üçün vaxtında tədbirlər hazırlayır, səmərəli kordinasiyanı və bu ölkələrdə sənayenin vəziyyətilə bağlı məlumat mübadiləsini təmin edir, islam bank industriyasının dünya böhranına yanaşmasını əks etdirən işçi sənədlər hazırlayır.
Şura eyni zamanda, İslam Sənaye-Maliyyə Forumunun tövsiyəsilə islam bank sektorunda üzv ölkələrin mərkəzi banklarının rolunun artırılması üçün inkişafla bağlı yeni layihələrin realizəsinə 44,67 mln. dolların ayrılmasına razılıq verib.
İslam Bankı Azərbaycana şəriət prinsipləri əsasında fəaliyyət göstərən bank yaratmağı təklif edib. İİB bu cür institutun yaradılmasını hələ 2006-cı ilin noyabrında ərəb institutlarının Bakıda keçirilən investisiya konfransında irəli sürüb. Azərbaycan hökumətilə İİB arasında investisiya fondunun (o, Azərbaycan investisiya şirkətilə şərikli yaradılıb) yaradılması ilə bağlı kommunike imzalanıb. Respublikada islam bankçılıq fəaliyyətinin nizamlanması üçün qanunverici bazanın hazırlanması Azərbaycan Milli Bankına tapşırılıb. İİB bu bankı hökumətlə və Azərbaycanın özəl strukturları ilə birgə təsis etməyə hazırdır.
Bu arada Moskvada şəriət qanunları əsasında fəaliyyət göstərən bank artıq qapadılıb. Qazaxıstan, Qırğızıstan və Özbəkistanda gələcəkdə bu cür banklarının yaradılması üçün qanun layihəsi işlənib hazırlanır.
Məqalə müəllifilə əlaqə ünvanı: [email protected]
