Azərbaycan, Bakı, 17 noyabr/ Trend , müxbir Ü.İsmayılova/ Azərbaycanın Sığortaçılar Assosiasiyası (ASA) sığorta şirkətləri üçün antiböhran planı hazırlayır, - Assosiasiyanın İdarə Heyətinin sədri, MBASK sığorta şirkətinin rəhbəri Cəmil Məlikov bazar ertəsi bildirib.
"İdarə Heyətinin ötən həftə keçirilən iclasında Assosiasiyanın komitələrinə sığorta şirkətlərini gələn ilə hazırlamaq üçün tədbirlər planı işləmək tapşırılıb", - Məlikov bildirib.
Azərbaycanın əksər bankları dünya maliyyə böhranının təsiri ilə əlaqədar, avqustdan avtomobil alqısına kreditlərin verilməsini dayandırıblar ki, bu da ölkənin sığorta bazarına öz təsirini göstərib. Bazar iştirakçılarının rəyinə görə, ölkədə avtomobillərin 80 faizi bank kreditləri vasitəsilə satılır ki, bu da sığorta şirkətlərin sığorta haqqlarının həcminin xeyli dərəcədə azalmasına təsir göstərib. Məlikovun rəyinə görə, bu vəziyyət ölkənin sığorta bazarının sığorta haqlarının ümumi həcminin 15 faiz azalmasına gətirəcək.
Məlikov bildirib ki, Assosiasiyanın tədbirlər planına sığorta şirkətlərini maliyyə böhranının təsirindən qorunmağa hazırlamaq məqsədilə danışıqlar və xüsusi treninqlərin keçirilməsi daxildir.
İdarə Heyəti sədrinin sözlərinə görə, iclasda Assosiasiyanın 2009 -cu il üzrə strateji planı ilə nəzərdə tutulmuş tədbirlər - sığorta şirkətlərinin top-menecmenti və sığorta sahəsinin əməkdaşları üçün treninqlərin təşkili, ASA-nın təhsil və hazırlıq komitəsinin işi və ASA-nın komitələrinin iclaslarının keçirilməsinin təşkilati - texniki təminatı; sığorta üzrə elektron kitabxananın yaradılması, üzvlük haqlarının daxil olmasına nəzarət, ASA-nın üzvlərinə Assosiasiyanın fəaliyyət istiqamətləri və digər məsələlər üzrə informasiya və digər materialların göndərilməsi üzrə tədbirlər müzakirə edilib. Ümumilikdə plan 12 tədbiri əhatə edir.
Ölkədə fəaliyyət göstərən bütün sığorta şirkətlərini əhatə edən Azərbaycan Sığortaçılar Assosiasiyası 2006-cı ilin dekabrında yaradılıb. ASA-nın Müşahidə Şurasında beş şirkət təmsil olunub (MBASK, Standard Insurance, Beynəlxalq Sığorta Şirkəti, Azersigorta, Ateshgah).
Müəlliflə əlaqə saxlamaq üçün elektron ünvan: [email protected]