Azərbaycan, Bakı, 28 yanvar/ Trend , müxbir İ.Xəlilova/
Dünya Bankı Azərbaycanın Dövlət Neft Fonduna (ARDNF) sərmayə siyasətinə yenidən baxmağı və öz vəsaitlərini daha riskli maliyyə alətlərinə yatırmağı təklif edir.
ARDNF kimi uzunmüddətli sərmayə fondları (pensiya, dövlət fondları) öz vəsaitlərinin 30-40 faizini səhmlərə yatırırlar, - DB xəzinədarlığı və RAMP proqramının direktoru Cenifer Conson Kanari çərşənbə günü ARDNF-ın icraçı direktoru Şahmar Mövsümovla birgə mətbuat konfransında bildirib. Məsələn, Norveçin Neft Fondunun səhm portfeli onun aktivlərinin 60 faizinə çatır.
"10-20 il müddətinə belə uzunmüddətli sərmayələr daim özünü doğruldub. Belə ki, bu sərmayələr üzrə gəlirlilik istiqrazlarla müqayisədə bir neçə dəfə yüksəkdir, - Kanari deyib. Azərbaycan əhalisinə aydın olmalıdır ki, vəsatilər səhmlərə yatırılırsa, qısamüddətli perspektivdə (1 il ərzində) qiymətli kağızların dəyərinin yüksək dəyişkənliyinin hətta mənfi gəlirliliyə gətirəcəyinə hazır olmaq lazımdır".
Onun rəyinə görə, qısa zaman aralığında bu vəziyyət aradan qalxır və səhmlərin idarə edilməsindən əldə olunan gəlirlər bir neçə dəfə artır. Belə sərmayə siyasətinə keçənədək ölkə səhmlərin qiymətlərində istənilən dəyişikliklərə hazır olmalıdır.
"İndiyədək ARDNF mühafizəkar siyasət aparırdı və bu, həmin dövr ərzində vəsaitlərin idarə edilməsi üçün platformanın formalaşması ilə bağlı idi, - Kanari deyib. - Lakin indi gələcəkdə ölkəyə böyük gəlirlər gətirəcək daha çətin maliyyə alətlərinə sərmayə yatırmağın vaxtı gəlib çatıb".
Neft Fondu ilk dəfə səhm portfelinin genişləndirilməsi planlarını bəyan etsə də, dünya prosesləri ilə əlaqədar bu planlar təxirə salınıb, - ARDNF-ın rəhbəri bildirib.
"Bu qərar düzgündür və böhranın Neft Fondunun gəlirlərinə təsir göstərməməsi bunu təsdiq edir. Belə ki, səhmlərin dəyəri 50 faizədək azalıb, - Mövsümov vurğulayıb. - Ola bilsin, böhran yavaşladıqca 2009-cu ilin sonu - 2010-cu ilin əvvəlinədək sərmayə siyasətinə yenidən baxacaq və öz vəsaitlərimizi ucuzlaşan, amma müflisləşməyə yaxın olmayan şirkətlərin vəsaitlərinə yatıracağıq".
Neft Fondu RAMP (Reserve Assets management programme) Proqramı ilə əməkdaşlıq edir və 2007-ci ildən 100 mln. dollar vəsaiti Dünya Bankı xəzinədarlığının idarəsinə verib. Mövsümovun sözlərinə görə, hazırda DB xəzinədarlığının idarəsində yerləşdirmədən əldə olunan gəlirlər nəticəsində artan 114 mln. dollar var.
RAMP proqramı 40 ildən çoxdur ki fəaliyyət göstərir.
2007 - ci ilin yekunlarına görə, səhmlərdə Fondun aktivlərinin cəmi 0,1 faizi, ötən ilin yekunlarına görə isə 0,02 faizi (2,34 mln. dollar) yerləşdirilib.
2008 - ci ilin yekunlarına görə, ARDNF-ın sərmayə portfelinin 93,79 faizi (10,4 mlrd. dollar) qiymətli kağızlarda yerləşdirilib.
Vəsaitlərin 33,4 faizi 1 ilədək müddətli qiymətli kağızlarda, 60,66 faizi - 1 ildən 3 ilədək, 5,51 faizi - 3 ildən 5 ilədək, 0,26 faizi - 5 ildən 7 ilədək və 0,14 faizi - 7 ildən yüksək müddətli kağızlarda yerləşdirilib.
ARDNF-ın sərmayə portfelinin ümumi həcmi aktivlərin ümumi həcmi 11,219 mlrd. dollar olmaqla 11,119 mlrd. dollar təşkil edir.
Müəlliflə əlaqə saxlamaq üçün elektron ünvan: [email protected]