Azərbaycan, Bakı, 06 fevral / Trend , müxbir İ.Xəlilova/
"Beynəlxalq Maliyyə Korporasiyası (BMK) Azərbaycanın AGBank-ına müasir korporativ idarəetmə standartlarının (ACGP) tətbiqi üzrə pilot proqramı çərçivəsində texniki yardımını sona çatdırıb", - cümə günü layihə qrupunda deyilib.
Layihə çərçivəsində BMK AGBanka korporativ idarəetmə təcrübələrini beynəlxalq standartlara çatdırmağa və digər yerli maliyyə institutları üçün qabaqcıl idarəetmə meyarını yaratmağa kömək edirdi.
BMK ilə iki illik əməkdaşlıqdan sonra AGBank öz nizamnaməsini və əsasnamələrini qabaqcıl beynəlxalq standartlara uyğunlaşdırıb və öz müşahidə şurasının tərkibini və fəaliyyətini mühüm dərəcədə təkmilləşdirib. Bank həmçinin daxili audit və risklərin idarəedilməsi funksiyaları sahəsində irəliləyişlər edib və hazırda dividend siyasətini və qabaqcıl açıqlama təcrübələrini qəbul etməkdədir.
"Bizim üçün qabaqcıl korporativ idarəetmə yalnız nəzəriyyə deyil, həmçinin bizim inkişafımızın mühüm hissəsidir", - AGBankın Müşahidə Şurasının sədri cənab Çingiz Əsədullayev qeyd edib
BMK ilə AGBank-ı uzun müddətli əməkdaşlıq tarixi bağlayır. İdarəetmənin təkmilləşdirilməsinə göstərdiyi maraq nəticəsində, Bank 2006-ci ildə BMK sərmayələrini cəlb edən ilk yerli maliyyə institutu olub.
"Bankın gələcəkdə də ölkənin korporativ idarəetmə sahəsində lider mövqeyini qoruyacağına inanır və digər bankların da bu təcrübədən yararlanacağına ümid edirik", - BMK-nın Azərbaycanda korporativ idarəetmə üzrə məsləhət proqramının rəhbəri xanım Kerolayn Brayt bildirib.
Layihə İqtisadi Əməkdaşlıq və İnkişaf Təşkilatının (OECD) normalarına müvafiq olaraq və İsveçrənin İqtisadi Məsələlər üzrə Dövlət Komitəsinin (Seco) maliyyə dəstəyi ilə korporativ idarətemə standartlarının tətbiqinə yardım edir. Azərbaycanda BMK-nın təşəbbüsü və SECO-nun maliyyə dəstəyi ilə həyata keçirilən layihənin rəsmi açılışı 2005-ci il yanvarın 26-da baş tutmuşdu. Onun həyata keçirilməsi üç ilə hesablanmış, ümumi büdcə 2,1 milyon təşkil etmişdi.
Layihənin realizəsi 2008-ci ilin avqustunda başa çatdırılmış və elə ötən ildən etibarən də proqramın ikinci mərhələsi başlanmışdı.
Məqalə müəllifi ilə əlaqə ünvanı: [email protected]
